“Salamat sa Inyong Dakong Gugma sa mga Tawo”
TINAMPO SA MAGSUSULAT SA PAGMATA! SA RUSYA
◼ Sa Siyudad sa Chita sa sidlakang bahin sa Siberia, gihimong tigomanan sa kongregasyon sa mga Saksi ni Jehova ang usa ka klasrom samtang gitukod pa ang ilang bag-ong Kingdom Hall. Mapasalamaton kaayo ang mga tagdumala sa eskuylahan tungod kay ilang gihinloan ug giayo ang maong klasrom. Nakadayeg usab sila sa kaayo ug sa kamatinahoron sa mga Saksi. Tungod niini, mihimo silag usa ka sulat pasalamat ngadto sa kongregasyon.
Ang usa ka bahin sa sulat nag-ingon: “Salamat sa inyong dakong gugma sa mga tawo nga inyong gipakita ngadto sa tanan, ug maingon man usab sa inyong pagsangyaw ug pagtabang kanila. Dili gayod namo malimtan ang inyong gipakitang kaayo sulod sa mga tuig sa atong panag-uban. Kini nagpamatuod nga ang mga tawong nagtuo sa Diyos maoy ligdong, kugihan, buotan, ug may pagtuo ug tumong sa kinabuhi.” Gipabilhan gayod sa mga Saksi Jehova ang maong mga komento.
◼ Mga 5,500 kilometros sa kasadpan sa Chita, giimbitar sa mga opisyales sa distrito sa St. Petersburg ang usa ka hawas sa sangang buhatan sa mga Saksi ni Jehova sa Rusya alang sa espesyal nga seremonya. Ngano? Kada tuig, sa dihang matunaw na ang niyebe, motabang ang mga Saksi sa maong dapit sa paghinlo sa 60 kilometros nga dalan duol sa sangang buhatan. Agig apresasyon sa nahimo sa mga Saksi, gipresentar sa opisyal ngadto sa hawas sa sanga ang usa ka sertipiko sa pasidungog. Namakpak ang tanang nanambong ug sa dihang nasayop paglitok sa ngalang Jehova ang mamumulong sa seremonya, gikoreksiyonan dayon siya sa mga dili-Saksi nga anaa didto. Nagpakita kini nga sinati gayod ang mga tawo sa ngalan sa Diyos ug sa mga tawong nagdala nianang ngalana.
Kini maoy resulta sa pagsangyaw nga gihimo sa mga 150,000 ka Saksi sa Rusya. Buot nila nga padayong ipakita ang ilang “dakong gugma sa mga tawo” pinaagi sa pagpaambit sa makapahupayng mensahe sa Bibliya alang niadtong mamati niana.—Mateo 22:39.
[Hulagway sa panid 29]
Nakadawat ang sanga sa Rusya ug sertipiko sa pasidungog