Si Rahab Mitago sa mga Espiya

KINING mga tawhana anaa sa suliran. Kinahanglan silang makapahawa, o sila ba mapatay. Sila maoy Israelitang mga espiya, ug ang babaye nga nagtabang kanila mao si Rahab. Tan-awon ta kon ngano nga kining mga tawhana anaa sa suliran.

Ang mga Israelita maoy andam na sa paglabang sa Suba sa Jordan ngadto sa yuta sa Canaan. Busa si Josue mipadala sa duha ka espiya sa pagpaniid sa yuta ug sa siyudad sa Jerico.

Sa nakasulod ang mga espiya sa Jerico, miadto sila sa balay ni Rahab. Apan may usa nga nakasulti sa hari sa Jerico bahin kanila. Ang hari mipadala ug mga tawo ngadto kang Rahab, ug mimando sila kaniya: ‘Ang mga lalaki nga naa sa imong balay, pagul-a sila!’ Apan si Rahab mitago sa mga espiya sa atop. Busa miingon siya: ‘Tinuod may mga lalaking mianhi sa akong balay. Apan sila nakabiya una pa ang ganghaan sa siyudad matakpan. Kon kamo magdali, madakpan ninyo sila!’ Ug busa ang mga lalaki migukod kanila.

Tapos sila makabiya si Rahab miingon sa mga espiya: ‘Nasayod ko nga si Jehova maghatag kaninyo ning yutaa. Nakabati kami sa kahibulongang mga butang nga iyang gihimo alang kaninyo. Ako nagmaluloton kaninyo, busa palihog magmaluluy-on kanako. Luwasa ang akong amahan ug inahan, ug ang akong mga igsoong lalaki ug mga babaye.’

Ang mga espiya misaad nga ilang luwason, apan si Rahab kinahanglang dunay buhaton. ‘Kuhaa kining pulang pisi,’ sila miingon, ‘Ug ihigot kini sa imong bentana. Dad-a ang tanan nimong mga paryente diha sa imong balay. Kon kaming tanan mobalik sa pag-agaw sa Jerico makita namo kining pisia diha sa imong bentana ug dili magpatay kang bisan kinsa sa imong balay.’ Unya ang mga espiya mibalik kang Josue, ug mitug-an kaniya sa tanang nahitabo.