Mamumuno ang mga Demonyo!
Si Satanas ug mga demonyo mapintas ug makuyaw sukad pa kaniadto. Sa unang mga panahon si Satanas mipatay sa mga hayop ug mga sulugoon sa matinumanong si Job. Sunod iyang gipatay ang napulo ka anak ni Job pinaagig pagpatungha ug “usa ka dakong hangin” sa pagguba sa balay diin didto sila. Human niana si Satanas mihampak kang Job pinaagig “hapdos nga mga hubag gikan sa lapalapa sa iyang tiil hangtud sa alimpulo.”—Job 1:7-19; 2:7.
Sa adlaw ni Jesus, ang mga demonyo naghimo sa pipila ka tawo nga dimakasulti ug buta. (Mateo 9:32, 33; 12:22) Ilang gisakit ang usa ka tawo ug nagyudyud kaniya nga samadsamaran ang kaugalingong lawas pinaagig mga bato. (Marcos 5:5) Ilang gipahinabo usab ang usa ka batang lalaki nga mosinggit, ug gilamba siya sa yuta, ug “mabangisong gikusokuso siya.”—Lucas 9:42.
Sa miagi, ang mga demonyo naghimo sa mga tawo nga masakiton ug gikusokuso ang uban
Karon, si Satanas ug mga demonyo mamumuno gayod sa gihapon. Ngani, ang ilang dautang kalihokan miuswag sukad sila gitambog gikan sa langit. Ang mga taho gikan sa tibuok kalibotan testigo sa ilang kabangis. Ilang gihampak ang ubang mga tawo pinaagig mga sakit. Ang uban ilang hasion sa gabii, dili magpakatulog kanila o magpadamgo kanilag kuyaw nga mga damgo. Ang uban ilang abusohan sa sekso. Ug ang uban pa gayod ilang yudyuron sa pagkabuang, pagkamamumuno, o sa paghikog.
Ang mga demonyo karon nakaingon sa kabangis sa pipila ka mga tawo; ang uban ilang ginasamok sa gabii, nga nagpadamgo kanila ug makuyaw nga mga damgo
Si Lintina, nagpuyo sa Suriname, misugid nga ang usa ka demonyo, o dautang espiritu, mipatay sa 16 ka miyembro sa iyang pamilya ug misakit kaniya sa pisikal ug mental sulod sa 18 ka tuig. Pinasukad sa iyang kaugalingong kasinatian miingon siya nga ang mga demonyo “malipay mosakit sa ilang digusto nga mga biktima hangtod sa kamatayon.”
Apan si Jehova makapanalipod sa iyang mga alagad gikan sa mga pag-atake ni Satanas.—Proverbio 18:10.