Ang Katuyoan Niining Maong Brosyur
ANG pilosopong Olandes nga si Spinoza misulat: “Naningkamot ako nga dili kataw-an ang mga lihok sa mga tawo, nga dili sila hilakan, ni dumtan, kondili nga sabton sila.” Ingong edukador, nag-atubang ka sa hagit nga paningkamotang masabtan ang mga panglantaw, mga kagikan, ug mga baroganan sa mga estudyante nga ubos sa imong pagdumala, lakip na sa mga tinun-an nga mga anak sa mga Saksi ni Jehova. Usahay, ang maong mga estudyante mahimong magbaton ug daw lahi nga baroganan sa pipila ka isyu. Apan kon ang maong mga aksiyon dayag nga gumikan sa relihiyoso ug moral nga mga baroganan sa estudyante, takos gayod kini sa imong pagtagad. Kining maong brosyur gigama sa Watch Tower Bible and Tract Society (ang ahensiya sa pagpamatik sa mga Saksi ni Jehova) ug gituyo nga makatabang kanimo nga mas masabtan ang mga estudyanteng Saksi. Kami nagalaom nga imo kining gahinan ug panahon aron basahon nga maampingon.
Ang pagsabot sa relihiyosong mga tinuhoan sa laing tawo wala magkahulogan nga imo kanang dawaton o sundon, ug ang pagpahibalo dili sama sa pagpangabig. Dili tinguha niining maong brosyur nga ipugos kanimo o sa imong mga estudyante ang relihiyosong mga panglantaw sa mga Saksi. Buot lamang namo nga masayod ka sa mga prinsipyo ug mga tinuhoan nga ginatudlo sa mga ginikanan sa pipila nimo ka estudyante aron mas masabtan nimo ang mga bata nga Saksi ug masayonan kang makigtambayayong kanila. Ingnon pa, ang mga ginahimo sa mga bata hayan dili kanunay motakdo sa mga ginatudlo kanila, kay ang matag bata nagakat-on sa pag-ugmad sa iyang kaugalingong tanlag.
Sama sa kadaghanang ginikanan, gusto usab sa mga Saksi ni Jehova nga ang ilang mga anak makapahimulos ug dako gikan sa ilang pagtungha. Nianang maong tumong, ilang gitudloan ang ilang mga anak nga makigtambayayong sa ilang mga magtutudlo. Agig balos, mapasalamaton ang mga ginikanang Saksi ug ang ilang mga anak sa dihang ang mga edukador motratar kanila uban sa pagsabot ug pagtahod.
Ang mga Saksi ni Jehova maoy mga Kristohanon nga ilado sa tibuok kalibotan. Hinunoa, usahay sayop ang pagsabot kanila. Busa, nanghinaot kami nga kining maong brosyur makatabang kanimo nga mas masabtan ang mga batang Saksi nga ubos sa imong pagdumala. Kami ilabina nga nagalaom nga imong masabtan kon nganong, sa pipila ka espisipikong mga kahimtang, sila moingon nga duna silay katungod nga malahi.