ABDON

[gikan sa lintunganayng pulong nga nagkahulogang “alagad”].

1. Usa ka maghuhukom, ang anak nga lalaki ni Hilel nga Piratonhon nga taga-Epraim. (Huk 12:13-15) Matod ni Josephus (Jewish Antiquities, V, 273 [vii, 15]), ang iyang walo-ka-tuig nga pagmando maoy malinawon, ug ang rekord sa Bibliya wala maghisgot nga dihay mga panaggubat sa maong yugto. Ang 40 ka anak ug 30 ka apo ni Abdon tanan “nagsakay sa kapitoan ka hingkod nga asno,” usa ka timailhan sa pagkaadunahan ug taas nga posisyon nianang panahona. Sa kataposan sa iyang pagkamaghuhukom, si Abdon gilubong sa iyang yutang natawhan sa Epraim.

Gituohan sa pipila nga si Abdon mao si “Bedan,” nga gihisgotan sa 1 Samuel 12:11; hinunoa, si Bedan lagmit gayod nga mao si Barak, kansang ngalan makita niining tekstoha sa Gregong Septuagint ug sa Syriac nga Peshitta.

2. Usa ka Benjaminhon, panganay nga anak nga lalaki ni Jeiel ug dayag nga maoy igsoon ni Ner nga apohan ni Saul.​—1Cr 8:​29, 30; 9:​35, 36, 39.

3. Usa ka opisyal sa palasyo ni Haring Josias (2Cr 34:20), gitawag ug Akbor sa 2 Hari 22:12.​—Tan-awa ang AKBOR Num. 2.

4. Anak nga lalaki ni Sasak sa tribo ni Benjamin; usa ka pangulo nga nagpuyo sa Jerusalem.​—1Cr 8:23-28.

5. Usa sa upat ka siyudad sa teritoryo sa Aser nga gihatag ngadto sa mga Levihanon sa banay ni Gerson (Gersom). (Jos 21:27-31; 1Cr 6:71-75) Lagmit nga mao kini ang Khirbet ʽAbdeh (Tel ʽAvdon) nga mga 6 km (3.5 mi) sa S sa Akzib. Kining dapita nahimutang sa A sa Wadi Qarn (Nahal Keziv) ug sa tiilan sa kabungtoran sa Galilea ug busa duol sa A nga tumoy sa Patag sa Aser.