AHAZIAS
[Nakahupot si Jehova].
Ang ngalan sa duha ka hari, usa sa Israel ug ang lain sa Juda.
1. Anak nga lalaki ni Ahab ug Jezebel, ug hari sa Israel sulod sa duha ka tuig sugod sa mga 919 W.K.P. Gisunod niya ang iyang idolatrosong mga ginikanan sa pagsimba kang Baal. (1Ha 22:51-53) Sa pagkamatay sa amahan ni Ahazias, gipahimuslan sa Moab ang higayon sa pag-alsa ug busa nakalingkawas gikan sa mabug-at nga tributo nga 100,000 ka nating karnero ug sa samang gidaghanon sa laking karnero nga wala pa matupihi. (2Ha 1:1; 3:4, 5) Kini nga pag-alsa gihubit ni Haring Mesa sa Moab diha sa inskripsiyon sa Bato sa Moab. Tingali tungod kay naaksidente siya ug sayong namatay, wala nay nahimo si Ahazias sa pagsakop sa mga Moabihanon.
Si Ahazias nakig-alyansa kang Jehosapat sa Juda sa usa ka negosyo sa pagpamuhat ug mga barko didto sa Ezion-geber sa Gulpo sa ʽAqaba. Ang proyekto wala uyoni sa Diyos tungod sa pagkadaotan ni Ahazias, ug ang mga barko nangaguba. (2Cr 20:35-37) Gipakita sa asoy sa 1 Hari 22:48, 49 nga gipangayo ni Ahazias ang awtorisasyon ni Jehosapat nga ang mga Israelinhong mga marinero maoy magdala sa mga barko duyog sa mga marinero sa Juda, usa ka hangyo nga gibalibaran ni Jehosapat. Kon kini nga hangyo gihimo sa wala pa mangaguba ang mga barko, gipakita lamang niini ang pagkawalay pagsalig ni Jehosapat kang Ahazias ug ang pagkamaampingon nga dili makasulod ang amihanang gingharian. Kon ang maong hangyo gihimo human maguba ang panon sa mga barko, tingali gipasabot ni Ahazias nga ang mga tawo ni Jehosapat kulang ug katakos ug maoy responsable sa pagkaguba sa mga barko ug busa nagsugyot nga ang mga barko ayohon ug palawigon pag-usab nga sakay pod ang tripulanteng mga Israelinhon. Niining kahimtanga ang pagbalibad ni Jehosapat lagmit maoy pag-ila sa gipadayag nga dili pag-uyon sa Diyos sa maong proyekto.
Usa ka aksidente sa balay, diin ang hari nahulog sa barandilya (tingali usa nga nagtabon sa agianan sa silaw sa adlaw) sa iyang lawak-sa-atop, ang milaygay kaniya ug nagpahinabog grabeng pagkasakit. (2Ha 1:2) Nga morag wala na maglungtad ang matuod nga Diyos, si Ahazias nagpasugo ug mga mensahero aron sa pagpakisayod sa Filistehanong diyos nga si Baal-zebub (nagkahulogang “Tag-iya sa mga Langaw”) kon siya ba mamaayo pa. Kay gisanta sa manalagnang si Elias, ang mga mensahero namalik ug nagpahayag sa mensahe ngadto sa hari nga siya mamatay diha sa iyang gihigdaan sa pagkasakit. Inay nga magmapainubsanon, si Ahazias nagpadalag usa ka panon sa 50 ka tawo nga gipangunahan sa ilang pangulo aron dad-on si Elias ngadto kaniya. Ang maong panon ug ang ikaduha, human ihatag ang sugo sa hari nga ‘palugsongon’ si Elias gikan sa bukid nga didto siya naglingkod, parehong giut-ot sa kalayo. Ang ikatulong panon nga gipadala sa gahian nga hari naluwas lamang tungod sa matinahorong pangamuyo sa pangulo nga ang iyang kinabuhi ug ang kinabuhi sa iyang mga tawo ‘mahimo untang bililhon sa mga mata ni Elias.’ Human niadto si Elias milugsong ug nagpahayag sa mensahe sa kamatayon sa atubangan ni Ahazias. Si Ahazias inanay nga namatay ug, tungod kay walay anak nga lalaki, gipulihan sa iyang igsoong lalaki nga si Jehoram.—2Ha 1:2-17.
2. Anak nga lalaki ni Jehoram ug Atalia ug gitala ingong hari sa Juda sulod sa usa ka tuig (mga 906 W.K.P.). Panahon sa paghari sa iyang amahan gisulong sa mga Filistehanon ug sa mga Arabo ang Juda ug gibihag ang tanang anak nga lalaki ni Jehoram gawas kang Jehoahaz (Ahazias) nga kamanghoran. (2Cr 21:16, 17; 22:1) Siya usa ka batan-on nga 22 anyos sa dihang siya milingkod sa trono, ug ang iyang dominanteng inahan nga si Atalia, anak nga babaye ni Ahab ug Jezebel, nagdaldal kaniya sa pagkadaotan. (2Ha 8:25-27; 2Cr 22:2-4) Siya miuban kang Haring Jehoram sa Israel (uyoan niya sa inahan) sa usa ka pagpakig-away batok sa Sirya didto sa Ramot-gilead, nga tungod niana nasamdan si Jehoram. Sa ulahi, giduaw ni Ahazias ang nagpaayo nga si Jehoram didto sa Jezreel.—2Ha 8:28, 29; 9:15; 2Cr 22:5, 6.
Kon idugtong ang duha ka asoy (2Ha 9:21-28; 2Cr 22:7-9), dayag nga nahitabo ang mosunod: sa nagsingabot si Jehu sa Jezreel, nasugatan niya si Jehoram ug Ahazias. Gipatay ni Jehu si Jehoram, apan si Ahazias mikalagiw. Niining tungora si Jehu wala mogukod kang Ahazias apan mipadayon sa Jezreel aron tiwason ang iyang buluhaton sa pagpahamtang ug paghukom didto. Sa kasamtangan ang mikalagiw nga si Ahazias misulay sa pagbalik ngadto sa Jerusalem; apan, nakaabot lamang siya taman sa Samaria, diin siya misulay sa pagtago. Ang mga tawo ni Jehu nga naggukod kang Ahazias nakakaplag kaniya didto sa Samaria ug nagdakop kaniya, ug gidala siya ngadto kang Jehu nga didto duol sa lungsod sa Ibleam, dili halayo sa Jezreel. Sa dihang nakita ni Jehu si Ahazias, gisugo niya ang iyang mga tawo sa pagpatay kaniya diha sa iyang karo. Ilang gihampak ug gisamaran siya sa dihang nagpaingon sa Gur, duol sa Ibleam; apan gitugotang makaikyas si Ahazias, ug siya mikalagiw ngadto sa Megido, diin siya namatay tungod sa iyang mga samad. Unya gidala siya sa Jerusalem ug gilubong didto. Ang mga asoy sa iyang kamatayon wala magkasumpaki apan nagsangkapay kini sa usag usa.
Ang 2 Cronicas 22:7 nag-ingon nga ang kamatayon ni Ahazias maoy “gikan sa Diyos,” ug busa si Jehu milihok ingong tiglaglag nga gigamit sa Diyos sa pagpatay niining tawhana nga nakig-uban sa hinukman nga balay ni Ahab. Si Ahazias gitawag usab ingong “Azarias” sa 2 Cronicas 22:6 (bisan tuod dinhi 15 ka Hebreohanong mga manuskrito ang mabasa nga “Ahazias”), ug ingong “Jehoahaz” sa 2 Cronicas 21:17; 25:23 (usa ka pananglitan sa pagbalhin sa ngalan sa Diyos aron magsilbing prefix inay nga suffix).