AMATISTA

Usa ka dili kaayo mahalon nga matang sa kristalon nga kuwarso, nga kolor purpura o biyoleta ug gigamit nga alahas. Kini pormag unom-ug-kilid nga mga kristal, ug ang kolor niini maoy tungod sa gigming nga mga tipik sa manganese o puthaw. Ang usa ka klase sa amatista maoy usa ka matang sa kuwarso (Kasadpanhon), samtang ang bililhon nga amatista (Sidlakanhon) maoy usa ka matang sa corundum o sapiro. Ang ngalang amatista naggikan sa Gregong pulong nga a·meʹthy·stos (nagkahulogang “dili makapahubog”), nga gigamit sa Gregong Septuagint sa paghubad sa Hebreohanong pulong nga ʼach·la·mahʹ sa Exodo 28:19 ug 39:12.

Ang binordahang “tabon sa dughan sa paghukom” sa hataas nga saserdote sa Israel gibutangan ug batong amatista ingong ang ikatulong bato sa ikatulong laray sa mga bato. (Ex 28:​2, 15, 19, 21; 39:12) Sa iyang panan-awon bahin sa “Bag-ong Jerusalem,” nakita ni Juan nga ang ika-12 nga patukoranan sa paril sa balaang siyudad maoy batong amatista.​—Pin 21:​2, 10, 19, 20.