BESTIALIDAD

Dili-kinaiyanhong pagpakigsekso sa usa ka lalaki o babaye uban sa usa ka hayop. Ang Moisesnong Balaod nagkondenar gayod niining mahilayong buhat, nga nagsilot ug kamatayon batok sa sad-ang tawo ug sa mananap. “Kon ihatag sa usa ka lalaki ang mogawas niyang binhi ngadto sa usa ka mananap, pagapatyon siya sa walay pakyas, ug patyon ninyo ang mananap. Ug kon ang usa ka babaye moduol sa bisan unsang mananap aron makighilawas niini, patyon mo ang babaye ug ang mananap.”​—Lev 20:​15, 16; 18:23; Ex 22:19; Deu 27:21.

Tungod niini nga pagdili, lakip ang ubang mga balaod sa Diyos maylabot sa mga relasyon sa sekso, natuboy pag-ayo ang moralidad sa mga Israelinhon kon itandi sa ilang mga silingan. Sa Ehipto, ang bestialidad nahimong bahin sa idolatrosong pagsimba sa mga hayop; pananglitan, gipamatud-an sa mga historyador nga adunay mga babaye nga nakigluon sa mga kanding. Ang samang mga buhat kaylap usab taliwala sa mga Canaanhon (Lev 18:23-30), ug gikataho nga gihimo usab didto sa Roma.

Ang Gregong pulong nga por·neiʹa nga gihubad nga “pakighilawas” naglakip sa mahilayong buhat sa bestialidad. (Tan-awa ang PAKIGHILAWAS.) Si bisan kinsa nga nagbatasan niining mahugaw nga buhat maoy dili-hinlo sa moral, ug kon ang usa ka membro sa Kristohanong kongregasyon magbatasan niini, siya palagpoton.​—Efe 5:3; Col 3:​5, 6.