BITINIA

Usa ka Romanhong lalawigan sa amihanang bahin sa Asia Minor. Kini nahimutang sa nailhan karong AK sa Turkey, gikan sa Istanbul ug miabot pasidlakan ubay sa habagatang kabaybayonan sa Itom nga Dagat. Sa ikaduhang misyonaryong panaw ni Pablo, sa dihang si Timoteo mikuyog kaniya ug kang Silas didto sa Listra, sila naningkamot nga mopanaw ngadto sa Bitinia, apan “ang espiritu ni Jesus wala motugot kanila.” (Buh 16:7) Ang maong dapit wala hisgoti nga gisangyawan sa mga apostoles, apan tataw nga adunay mga Kristohanon didto sa dihang si Pedro misulat sa iyang unang kanonikal nga sulat niadtong mga 62-64 K.P. (1Pe 1:1) Si Pliny nga Manghod, nga nagsulat gikan sa Bitinia ngadto sa Romanong emperador nga si Trajan sa dihang si Pliny maoy espesyal nga komisyonado, naghisgot sa daghang Kristohanon diha sa lalawigan, nga nag-ingong sa pagsugod sa ikaduhang siglo ang Kristiyanidad makaplagan dili lamang diha sa kalungsoran, kondili mikaylap usab ngadto sa “kabalangayan ug ingon man sa kabanikahan.”​—The Letters of Pliny, X, XCVI, 9.