BARPIN

Usa ka pangdayandayan nga kimpit nga ginama gikan sa metal ug may pangtusok o diladila nga pinaagi niana kini ikataod sa sinina sa usa ka tawo. Sa karaang mga panahon ang mga barpin gigamit sa mga lalaki ug mga babaye, sama sa mga Grego ug mga Romano. Ang Romanhong barpin o fibula usahay may bawog nga piraso sa metal nga may kaw-it sa usa ka tumoy ug usa ka pangtusok nga gikan sa pikas tumoy, nga samag alpiler. Ang barpin dili lamang pahiyas kondili mapuslanon usab, sanglit sagad kining gigamit sa pagtapot sa duha ka bahin sa usa ka bandana o kupo. Ang karaang mga barpin maoy ginama gikan sa bronse, puthaw, bulawan, o plata. Napamatud-an sa arkeolohikanhong mga kaplag nga kini gigamit sa Palestina niadtong unang panahon, nga lakip niini mao ang bawog nga mga barpin nga nakaplagan sa Tell en-Nasbeh.

Sa dihang ang mga Israelinhon gihatagan ug pribilehiyo sa pag-amot alang sa pagtukod sa tabernakulo, ang mga lalaki ug mga babaye nagdalag lainlaing mga pahiyas lakip na ang “mga barpin” o “mga bilya sa bakos.” (Ex 35:​21, 22) Kini nga mga barpin lagmit maoy mga pahiyas nga may kaw-it, kay ang samang Hebreohanong pulong nga gigamit alang niini (chach) gihubad nga “kaw-it” sa ubang teksto. (2Ha 19:28) Apan, ang Kasulatan wala maghubit niini nga mga barpin.​—Tan-awa ang DAYANDAYAN, PAHIYAS.