TRANGKA

Usa ka gamit sa pagsira sa pultahan o ganghaan aron walay makasulod. (Huk 3:​23, 24; Neh 3:​3, 6, 13-15) Ang trangka sa karaang kapanahonan sagad maoy usa ka balabag nga kahoy nga isuksok sa kilid agi sa kanalkanal diha sa patindog nga kahoy nga gipatapot sa pultahan. Sa pagsira sa pultahan, kini nga balabag isuksok sa suksokanan diha sa poste sa pultahan ug trangkahan pinaagig kahoy o puthawng mga tarogo nga gipasibo sa mga bangag diha sa balabag. Sa pag-abli sa pultahan, usa ka yawi ang isuksok aron mahandos ang mga tarogo, ug busa maabli kini. Ang suksokanan, o bangag, nga didto niini isuksok ang balabag gihisgotan sa dalagang Sulamita sa dihang giasoy niya ang iyang damgo diin ang iyang hinigugmang magbalantay nahimulag kaniya pinaagi sa trinangkahan nga pultahan.​—Aw 5:2-5; tan-awa ang YAWI.