MEDEBA

Kining dapita giisip nga mao ang modernong Madaba, usa ka lungsod nga nahimutang sa usa ka ubos, hanayhay nga bungtod nga mga 20 km (12 mi) sa S sa amihanang tumoy sa Patayng Dagat. Ang karaang “dalan sa hari” nagkonektar niini sa ubang mga siyudad sa S sa Jordan. (Itandi ang Num 20:17.) Ang Madaba nahimutang sa usa ka walay kahoy apan tabunok nga patag, o patag ibabaw sa bukid. Diha sa maong patag, ang “patag sa bukid sa Medeba,” ang panon sa mga karnero ug mga kanding adunay kasibsiban.​—Jos 13:​9, 16.

Human mapildi sa mga Israelinhon ang Amorihanon nga si Haring Sihon, ang Medeba nalakip sa teritoryo nga gihatag ngadto sa tribo ni Ruben. (Jos 13:​8, 9, 15, 16) Mopatim-aw nga una pa niana, ang mga Amorihanon nag-ilog sa Medeba gikan sa mga Moabihanon. (Num 21:25-30) Ubay-ubayng kasiglohan sa ulahi, sa usa ka pagpakiggubat batok sa mga Ammonhanon, ang kasundalohan ni Haring David nga gipangulohan ni Joab nagpildi sa Aramaeanhon (Siryanhon) nga mersenaryong kasundalohan nga nagkampo sa atubangan sa Medeba.​—1Cr 19:6-16.

Sumala sa Bato sa Moab (linya 8), gipanag-iya ni Haring Omri sa Israel (mga 951-941 W.K.P.) ang “yuta sa Mehedeba (Medeba).” Ang linya 30 sa samang monyumento nagpakita nga gitukod pag-usab ni Haring Mesa sa Moab ang Medeba ug ang ubang mga siyudad sa maong dapit. Apan, lagmit nga nabawi sa mga Israelinhon ang pagmando sa Medeba sa dihang si Jeroboam II (mga 844-804 W.K.P.) “nagpasig-uli sa utlanan sa Israel gikan sa pagsulod sa Hamat hangtod sa dagat sa Araba.” (2Ha 14:25) Apan wala kini magdugay, sanglit ang pahayag ni Isaias (mga 778–human sa 732 W.K.P.) batok sa Moab nagpakita nga ang Medeba niadtong higayona nailalom sa pagmando sa mga Moabihanon ug gitagna nga ang mga Moabihanon ‘motiyabaw’ tungod sa pagkapildi sa siyudad.​—Isa 15:​1, 2.