METEG-AMA

[Busal sa Ama (lagmit, Maniko)].

Usa ka dapit nga giilog ni Haring David gikan sa mga Filistehanon. (2Sa 8:1) Sanglit walay nailhang dapit nga ingon niana ug ngalan, ang Meteg-ama lagmit usa ka mahulagwayong termino nga nagtumong sa usa sa pangunang mga siyudad sa Filistia. Ang samang asoy sa 1 Cronicas 18:1 nag-ingon nga, “sa Gat ug sa mga lungsod nga sakop niini.” Sa 2 Samuel 8:1 lagmit nga gisabot sa American Standard Version ang pulong nga “ama” sa Meteg-ama ingong naggikan sa Hebreohanong pulong alang sa “inahan” ug naghubad sa Meteg-ama ingong “ang busal sa inahang siyudad.” Kini nga ideya maoy gipakita sa An American Translation, nga mabasang “ang paggahom sa kaulohang siyudad” inay nga “Meteg-ama.”