PEREZ

[Pagkasisi; Pagkasisi sa Batadbatad].

Usa sa kaluhang anak nga lalaki ni Juda pinaagi sa iyang umagad nga babayeng si Tamar. Sa pagkatawo, ang igsoong lalaki ni Perez nga si Zera ang unang migimaw apan miatras, ug si Perez ang unang migula, nga nagpasisi sa batadbatad ni Tamar. (Gen 38:24-30) Padayong nangibabaw si Perez sa iyang igsoon ug kanunayng gilista nga una kaniya, ug sa ilang duha mas dungganon ang iyang banay. (Ru 4:12) Si Perez ug ang iyang duha ka anak nga lalaki, si Hesron ug Hamul, gilista nga lakip niadtong kaliwat ni Jacob nga miadto sa Ehipto, diin silang tulo nahimong mga pangulo sa tagsatagsa ka banay ni Juda. (Gen 46:​8, 12) Gawas niini, wala nay girekord nga personal nga impormasyon bahin kaniya.

Ang mga paghisgot kang Perez sa panguna maoy maylabot sa talaan sa mga kaliwat, diin ang kinadaghanan sa talaan sa mga kaliwat ni Juda masubay pinaagi kang Perez. (1Cr 2:​4, 5, 9-55; 4:1-20) Ang mga banay ni Perez ug sa iyang duha ka anak nga lalaki naglangkob sa dakong bahin sa tribo ni Juda sa panahon sa ikaduhang pagrehistro sa kamingawan. (Num 26:20-22) Ang pipila sa mga kaliwat ni Perez maoy sakop sa unang dibisyon sa mga sundalo ni David nga moalagad sa unang bulan. (1Cr 27:3) Daghan sa mga anak ni Perez ang nakabalik gikan sa pagkadestiyero sa Babilonya, ug 468 kanila ang mipuyo sa Jerusalem. (1Cr 9:​3, 4; Neh 11:​4, 6) Ang usa ka direktang linya sa talaan sa kagikan sukad kang Perez miagi kang Boaz ngadto kang David ug sa kataposan ngadto kang Jesus nga Mesiyas.​—Ru 4:18-22; 1Cr 2:4-15; Mat 1:3; Luc 3:33.