PIBESET

[gikan sa Ehiptohanon, nga nagkahulogang “Balay ni [sa diyosa nga si] Bastet”].

Usa ka siyudad nga gihisgotan kauban sa On (Heliopolis) diha sa Ezequiel 30:17 sa usa ka tagna nga gitumong batok sa Ehipto. Ang Septuagint nga hubad sa teksto nagpaila sa Pibeset nga mao ang Bubastis, usa ka karaang siyudad diha sa rehiyon sa Delta, nga ang mga kagun-oban niini makita sa Tell Basta, mga 70 km (43 mi) sa AAS sa Cairo, duol sa modernong siyudad sa Zagazig. Ang ngalan sa karaang siyudad ingon sa makita sa Ehiptohanong mga inskripsiyon susama kaayo sa Hebreohanong Pibeset.

Ang Pibeset, o Bubastis, mao ang sentro sa pagsimba sa diyosa nga si Bastet, o Bast, usa ka iring nga diyosa nga sagad gihulagway pinaagi sa usa ka ulo sa iring. Ang naglungtad nga usa ka dakong lubnganan alang sa mga iring duol sa siyudad nagpamatuod sa pagkaprominente sa pagsimba kaniya didto. Usa ka tinuig nga pista ang gihimo sa pagpasidungog kang Bastet, nga nagpahugop sa linibo ka magsisimba didto gikan sa tanang bahin sa nasod.

Bisag ang Pibeset mao ang kaulohan sa ika-18 nga nome (distrito) sa Ubos nga Ehipto, nakab-ot niini ang kinadak-ang politikanhong kabantog pinaagi sa linya sa Libyanhong mga magmamando sa Ehipto nga nagsugod kang Paraon Sisak, usa ka kontemporaryo ni Solomon ug Rehoboam. (1Ha 11:40; 14:​25, 26) Ang Pibeset mao ang harianong siyudad ni Sisak. Ang tagna ni Ezequiel naghisgot sa pagsakop sa Babilonya sa Ehipto sa dihang mapukan ang Pibeset. Ang mga Persianhon sa ulahi naglaglag sa siyudad, ug karong adlawa ang mga kagun-oban lamang ang nagpabilin sa karaang dapit.