SELEUCIA

Usa ka kinutaang lungsod sa Mediteranyo nga nagsilbing dunggoanan alang sa Antioquia sa Sirya ug nahimutang nga mga 20 km (12 mi) sa HK niana nga siyudad. Kining duha ka dapit gikonektar pinaagig dalan; ug ang malawigan nga Suba sa Orontes, nga molatas sa Antioquia, moagos ngadto sa Dagat Mediteranyo duol sa H sa Seleucia. Inubanan ni Bernabe, si Pablo milawig gikan sa Seleucia sa pagsugod sa iyang unang misyonaryong panaw niadtong mga 47 K.P. (Buh 13:4) Bisan tuod human niadto kini wala na hisgoti diha sa asoy sa Mga Buhat, lagmit nga nalangkit ang Seleucia sa mga hitabo nga giasoy diha niini. (Buh 14:26; 15:30-41) Aron ipalahi kini nga siyudad gikan sa ubang mga dapit nga pareho ug ngalan diha sa Tungang Sidlakan niadtong karaang panahon, kini usahay gitawag ug Seleucia Pieria. Kini maoy A lamang sa modernong-adlaw nga Süveydiye, o Samandag, sa Turkey. Tungod sa mga binanlas nga yuta gikan sa Orontes, ang karaang dunggoanan sa Seleucia nahimong kalamakan.