AJENJO

[Heb., la·ʽanahʹ; Gr., aʹpsin·thos].

Mao kini ang ngalan sa daghan, sagad kahoyon nga mga tanom nga pait kaayo ug isog kaayog baho. Ubay-ubayng matang sa ajenjo ang makaplagan sa Palestina, ilabina sa desyertong mga dapit. Ang labing komon mao ang Artemisia herba-alba, usa ka gamayng kahoykahoy nga moabot sa gitas-ong 40 sm (16 pul.). Sa Kasulatan, ang ajenjo gitandi sa mga epekto sa imoralidad (Pr 5:4) ug sa pait nga kasinatian nga modangat ug nasinatian gayod sa Juda ug Jerusalem diha sa mga kamot sa mga Babilonyanhon. (Jer 9:15; 23:15; Lam 3:​15, 19) Kini usab naghawas sa inhustisya ug pagkadili-matarong (Am 5:7; 6:12) ug gigamit maylabot sa mga apostata. (Deu 29:18) Sa Pinadayag 8:​11, ang ajenjo nagtumong sa mapait ug makahilong substansiya, nga gitawag usab ug absinthe.