SOFONIAS

[Si Jehova Nagtago (Nagtipig)].

1. Usa ka Levihanon diha sa linya sa kaliwatan gikan kang Kohat ngadto kang Samuel ug Heman.​—1Cr 6:33-38.

2. Usa ka manalagna ni Jehova sa Juda panahon sa sayong bahin sa paghari ni Josias; magsusulat sa basahon nga nagdala sa iyang ngalan. Lagmit si Sofonias maoy usa ka apo-sa-lapalapa ni Haring Ezequias.​—Sof 1:1; tan-awa ang SOFONIAS, BASAHON NI.

3. Usa ka pangunang saserdote sa panahon sa kataposang dekada sa gingharian sa Juda; anak nga lalaki ni Maaseias. Si Sofonias kaduha nga gipadala ni Zedekias ngadto kang Jeremias, una aron sa pagpakisayod kang Jehova bahin sa kaugmaon sa Juda ug sa ulahi aron sa paghangyo kaniya sa pag-ampo alang kanila. (Jer 21:1-3; 37:3) Si Sofonias nakadawat ug usa ka sulat gikan sa usa ka mini nga manalagna sa Babilonya nga nag-awhag kaniya sa pagbadlong kang Jeremias, apan inay sundon kini, gibasa ni Sofonias ang sulat ngadto kang Jeremias, kinsa nagsulat dayon sa tubag ni Jehova. (Jer 29:24-32) Human malaglag ang Jerusalem, si Sofonias, ang ikaduhang saserdote niadtong panahona ubos ni Seraias, gidala ngadto kang Nabucodonosor didto sa Ribla ug gipatay.​—Jer 52:​24, 26, 27; 2Ha 25:​18, 20, 21.

4. Ang amahan ni Josias, o Hen, nga usa sa miamot ug bililhong mga metal human sa yugto sa pagkadestiyero aron sa paghimog usa ka purongpurong alang sa Hataas nga Saserdoteng si Josue.​—Zac 6:​10, 11, 14.