GINADILI NGA KALAYO UG INSENSO

Sa Levitico 10:1 ang Hebreohanong pulong nga zar (feminine, za·rahʹ; sa literal, estranyo) gigamit maylabot sa ‘ginadili nga kalayo, nga wala isugo sa Diyos kanila’ apan gitanyag sa mga anak nga lalaki ni Aaron nga si Nadab ug Abihu sa atubangan ni Jehova ug tungod niana iyang gilaglag sila pinaagig kalayo. (Lev 10:2; Num 3:4; 26:61) Human niana, si Jehova miingon kang Aaron: “Ayaw pag-inom ug bino o makahubog nga ilimnon, ikaw ug ang imong mga anak nga lalaki uban kanimo, sa dihang mosulod kamo sa tolda nga tagboanan, aron dili kamo mamatay. Usa kini ka lagda hangtod sa panahong walay tino alang sa inyong mga kaliwatan, aron sa paghimog kalainan tali sa balaan nga butang ug sa dili balaan ug tali sa mahugaw nga butang ug sa hinlo, ug aron tudloan ang mga anak sa Israel sa tanang regulasyon nga gisulti ni Jehova kanila pinaagi kang Moises.” (Lev 10:8-11) Kini daw nagpakita nga si Nadab ug Abihu nahubog, nga tungod niana sila nangahas sa pagtanyag ug ginadiling kalayo. Ang maong kalayo lagmit gidili tungod kay ang panahon, dapit, o paagi sa pagtanyag niini dili subay sa balaod, o tingali kadto maoy usa ka insenso nga ang sambog lahi sa gihisgotan sa Exodo 30:​34, 35. Ang ilang pagkahubog wala magpahigawas kanila sa ilang sala.

Ang samang pulong nga zar gigamit diha sa Exodo 30:​9 nga nagtumong sa pagsunog ug ginadiling insenso ibabaw sa halaran sa insenso diha sa Balaang Dapit.​—Tan-awa ang ftn sa Rbi8.