Sila Lahi Usab Tungod sa Pagkamaminatud-on
SIYA nahisagmuyo sa iyang nakita ang tiket sa parking ilalom sa tigpahid sa salamin sa kotse. Ang multa $25 (U.S.), ug nasakit siya tungod kay kadto dili matarong. Walay mga karatula nga nagdili sa pagparking. Grabe pa mao ang kamatuorang siya tagalayong dapit ug dili makabalik sa siyudad sa pag-apelar sa iyang kaso. Busa iyang giletratohan ang dapit sa pagpamatuod nga walay mga balaod nga pasidaan nga gipaskil sa bisan diin. Ug kay usa sa mga Saksi ni Jehova, iyang gihangyo ang kaubang Saksi sa pagpakita sa korte sa trapiko ilis kaniya.
Ania ang taho sa iyang higala bahin sa nahitabo sa korte niadtong buntaga:
“Sa dihang tawgon ka sa atubangan sa huwes, kinahanglang imong ihatag ang imong ngalan ug direksiyon. Unya ilang ipatuman ang panumpa sa pagkamaminatud-on. Una nila ako papanumpaa, ang eskribiyente sa korte, usa ka tigulang nga lalaki, mihangyo nga akong sublion ang direksiyon sa kalye. Sa miingon ako, ‘124 Columbia Heights,’ siya lagmit nakaila niadto ingong direksiyon sa hedkuwarter sa kalibotan sa Watch Tower Society ug sa mga Saksi ni Jehova. Sa paglingi ngadto sa huwes, siya miingon: ‘Wala kay kabalak-an niini, Huwes. Kini sila maayong mga tawo. Sila dili mamakak! Dili gayod sila mamakak! Sila dili makabakak! Ang ilang relihiyon dili motugot niana, ug sila nagatumang estrikto niana. Ako walay nahibaloang si bisan kinsa sa ilang mga lalaki o mga babaye nga namakak. Sila labing maminatud-on gayod. Nakakita ako sa daghang panahon sa dihang sila makalikay unta sa tiket sa pagparking pinaagi sa pagsultig diyutayng bakak, apan dili nila buhaton kana.’
“Unya, sa pagliso kanako, siya mipahayag, ‘Ako nasayod nga dili ka mamakak tungod kay nahibalo ka ba kon kinsay mobangon sa iyang lubnganan kon mamakak ka?’ ‘Kinsa ba?’ ako nangutana. ‘Ang Huwes, Huwes Rutherford [usa ka panahon presidente sa Watch Tower Society],’ siya mitubag. ‘Ako tighatod ug sulat kaniya 47 ka tuig nga miagi. Nasayran ko na ang mga Saksi ni Jehova sa wala pa sila modako. Ang Huwes talagsaong tawo!’
“Tapos niadto, ang huwes sa korte wala gani magtagad sa pagpapanumpa kanako. Gihangyo niya ako sa pagpresentar sa akong kaso, nga akong gihimo. Iyang hukom? ‘Dili sad-an.’”
Ang mga Saksi ni Jehova ‘buot magagawi nga maminatud-on sa tanang butang.’ (Hebreohanon 13:18) Ug ang ilang pagsunod sa pagkamaminatud-on maoy usa sa daghang paagi nga sila lahi sa kalibotan.