Kinabuhi ug Ministeryo ni Jesus

Kon Nganong si Jesus Mianhi sa Yuta

SUMALA sa atong nahibaloan sa miaging isyu niining magasina, puliki ang adlaw ni Jesus uban sa upat niya ka disipulo sa Capernaum. Una, iyang giayo ang tawong gidemonyohan sa sinagoga, dayon sa balay ni Pedro iyang giayo ang ugangang-babaye ni Pedro, ug unya hangtod sa gabii gidad-an siya sa katawhan sa Capernaum sa tanan nilang masakiton aron ayohon. Walay panahon sa pagkinaugalingon.

Karon kini sayo sa sunod buntag. Samtang ngitngit pa, mibangon si Jesus ug migawas. Siya mipaingon sa usa ka dapit nga mamingawon diin siya makaampo ngadto sa iyang Amahan nga pribado. Apan ang pagkinaugalingon ni Jesus makadiyut ra kay dihang naamgohan ni Pedro ug sa uban nga siya nawala, sila nanggawas sa pagpangita kaniya.

Sa ilang nakaplagan si Jesus, si Pedro miingon: “Ang tanan nagapangita kanimo.” Buot sa mga tawo sa Capernaum nga si Jesus magpabilin uban kanila. Gipabilhan nila ang iyang gibuhat alang kanila! Apan si Jesus mianhi ba sa yuta sa paghimo ilabina sa milagrosong pagpangayo? Unsay iyang giingon?

Sumala sa usa ka asoy sa Bibliya, gitubag ni Jesus ang iyang mga disipulo: “Mangadto kita sa laing dapit, ngadto sa kalungsoran sa duol, aron ako makawali usab didto, kay tungod niini nga katuyoan ako mianhi.” Bisan pag giawhag sa mga tawo nga magpabilin si Jesus, iyang giingnan sila: “Ngadto usab sa ubang siyudad kinahanglang akong imantala ang maayong balita sa gingharian sa Diyos, tungod kay alang niini ako gipadala.”

Oo, si Jesus mianhi sa yuta sa linain aron sa pagwali sa Gingharian sa Diyos nga mobayaw sa ngalan sa iyang Amahan ug sa malungtaron magsulbad sa tanang sakit sa tawo. Apan, sa paghatag ebidensiya nga siya gipadala sa Diyos, gihimo ni Jesus ang milagrosong mga pagpang-ayo. Sa samang paagi si Moises, kasiglohang miagi, mihimog mga milagro sa pagpamatuod nga siya alagad sa Diyos.

Karon, sa mibiya si Jesus sa Capernaum aron sa pagwali sa ubang siyudad, ang upat niya ka disipulo mikuyog kaniya. Kining upat mao si Pedro ug iyang igsoong si Andres, ug si Juan ug ang iyang igsoon si Santiago. Imong mahinumdoman nga, sa miagi rang semana, sila gidapit nga mahimong unang nagapanawng kaubang magbubuhat ni Jesus.

Ang pagsuroy ni Jesus sa Galilea nga nagwali uban sa upat niya ka disipulo sa kahibulongan malamposon! Ngani, ang taho mahitungod sa iyang kalihokan nakakaylap ngadto sa tibuok Sirya. Ang dagkong mga panon gikan sa Galilea, Judea, ug tabok sa Subang Jordan misunod kang Jesus ug sa iyang mga disipulo. Marcos 1:35-39; Lucas 4:42, 43; Mateo 4:23-25; Exodo 4:1-9, 30, 31.

◆ Unsay nahitabo sa pagkabuntag tapos sa puliki nga adlaw ni Jesus sa Capernaum?

◆ Nganong gipadala si Jesus sa yuta, ug unsay katuyoan sa iyang mga milagro?

◆ Kinsay mikuyog kang Jesus sa iyang pagsuroy sa Galilea nga nagwali, ug unsa ang sanong ngadto sa mga kalihokan ni Jesus?