Mga Pangutanang Gisukna sa mga Tawo Bahin sa Alkohol
“ANG mga tawong manggialamon dili gayod moinom ug bino.” Kana ang gipahayag sa usa ka Nigerianong klerigo. Dili pa dugay, kanang pahayaga isalikway lamang ingon nga kana pagkapanatiko ug pagkapig-ot sa kaisipan. Apan, karong adlawa, ang kontra-alkohol nga pagbati nagauswag diha sa pila ka bahin sa kalibotan.
Ang usa ka bag-ong surbi sa Reader’s Digest/Gallup (U.S.), pananglitan, nagpadayag nga “ang mga Amerikano nagsugod sa pag-inom ug menos.” Ang magasing Time susamang nagtaho nga “ang Amerika nagakunhod sa [pag-inom ug alkohol], ug nagahimo niana sa labi pang tulin kay sa bisan unsang panahon sukad miepekto ang Pagdili niadtong 1920.” Ang Pransiya nagtaho sa pag-us-os sa pag-inom ug bino.
Ang hinungdan sa maong kiling padulong sa pagkakasarangan? Gipatugbaw sa pipila ang singgit mahitungod sa makalilisang nga pagpatay diha sa publikong kadalanan tungod sa hubog nga mga drayber. “Niadtong 1983,” miangkon ang Reader’s Digest, “ang alkohol . . . mikostar sa [Tinipong Bansa] ug $89.5 bilyon diha sa nawalang trabaho ug pagkamabungahon, pag-atiman sa panglawas, pagkawala sa propiedad ug krimen, ingon man ang dili-masukod nga kadaot sa mga kinabuhing pamilyahanon niadtong nalangkit.” Nan, dili katingalahang ang World Health Organization sa UN karong bag-o misugyot nga ang mga gobyerno ‘mag-estrikto kon bahin sa pagbaligya sa alkohol sa interes sa panglawas ug kaayohan sa ilang mga molupyo.’—New Nigerian, Marso 16, 1983.
Ang pipila nagaergo gani pabor sa paglikay. Ang Nigerianong klerigo nga gikutlo sa ibabaw miangkon: “Ang Proverbio 20:1 nagaingon sa tino nga kadtong nagainom ug bino dili manggialamon.” Ug nagpatuo pa ang laing magwawali: “Ang Balaang Kasulatan nagasaway sa alkohol diha sa Basahon sa Isaias,” nga nagtumong sa mga teksto sa Isaias 5:11, 12, ug 22.
Tungod nianang mga pangangkona, ang mga tawo nahibulong: Unsay kahulogan sa maong mga teksto sa Kasulatan? Ang Bibliya bug-os bang nagadili sa pag-inom ug alkoholikong ilimnon? Dili ba si Jesus mismo miinom man ug bino, o nalangkit ba ang dili-alkoholikong duga sa ubas? Tungod sa dayag nga mga kapeligrohan nga nalangkit, dili ba labing maayong ang mga Kristohanon molikay sa pag-inom ug alkohol? Ang mga tubag niining mga pangutanaha hikaplagan pinaagi sa pagsusi sa Bibliya mismo.