Paghalad sa mga Batan-on—Dili Gikan sa Diyos
SA GAWAS sa kuta sa Jerusalem, sa karaang panahon dihay dapit nga gitawag Topheth. Didto, ang apostatang mga Israelinhon, lakip kang Haring Ahaz ug Manasse, tigpraktis sa makalilisang nga kostumbre sa paghalad ug bata. Sa kataposan, gipahunong sa matinumanong haring Josias ang praktis sa paghimo sa Topheth nga dili maayong dapit sa relihiyosong mga seremonya.—2 Hari 23:10; 2 Cronicas 28:1-4; 33:1, 6.
Nganong gitawag ang dapit nga Topheth? Ang sinugdanan sa pulong gilalisan, apan makaikag ang pagtan-aw sa gipamulong sa Hudiyohanong eskolar nga si David Kimhi (c. 1160-c. 1235) bahin sa maong dapit. Naghisgot sa 2 Hari 23:10, nga niini gihisgotan ang Topheth, siya misulat: “Ang ngalan sa dapit nga diin ilang ipaagi ang ilang mga anak nga lalaki [sa kalayo] kang Moloch. Ang ngalan sa dapit mao ang Topheth, ug sila miingon nga gitawag kini niining ngalana tungod kay sa panahon sa pagsimba sila manayaw ug magtugtog ug mga tambol [Hebreohanon, tup·pimʹ] aron ang amahan dili makadungog sa pagtiyabaw sa iyang anak nga lalaki dihang ilang ipaagi siya sa kalayo, ug aron dili masubo ang iyang kasingkasing bahin kaniya ug kuhaon siya gikan sa ilang kamot. Ug kining dapita mao ang walog nga gipanag-iya sa tawong ginganlag Hinnom’ ug kadto gitawag ‘Walog sa Hinnom’ ug ‘Walog sa Anak ni Hinnom’ . . . gihugawan ni Josias kadtong dapita, gihimo kadto nga basurahan, aron didto ilabay ang mga patay ug ang tanang hugaw, aron dili na mobalik pa sa kasingkasing sa tawo aron ipaagi ang iyang anak nga lalaki ug ang iyang anak nga babaye sa kalayo alang kang Moloch.”
Sa modernong panahon, ang diyosdiyos nga si Moloch maoy makasaysayanhon na lamang nga tulokibon, ug sa walay duhaduha daghan ang wala makasabot nganong gipatay sa mga tawo ang ilang mga anak alang kaniya. Apan, ang mga hamtong karon nga panahon daw andam sa pagpatay sa ilang anak kon kagustohan nila. Karon lang nga siglo, milyonmilyon sa mga batan-on ang gipanghalad diha sa altar sa gubat. Kada tuig, ang dili-maasoyng milyonmilyong wala pa matawong mga bata gituyo sa pagpatay diha sa mga aborsiyon, gipatay ang kadaghanan kanila tungod kay ang ilang pagsamkon maoy resulta sa kasuwal nga sekso o tungod kay ang pagpakatawo kanila makababag sa estilo sa kinabuhi sa ilang mga ginikanan. Busa, kining mga bataa nahimong mga halad sa mga diyos sa seksuwal nga kagawasan ug sa materyalismo.
Si Jehova miingon nga ang pagsunog sa mga bata alang kang Moloch dulumtanan. (Jeremias 7:31) Lahi ba ang iyang paglantaw sa walay piling pagpamatay sa mga batan-on sa atong kaliwatan?
[Hulagway sa panid 31]
Paghalad sa bata ngadto sa bakak nga diyosdiyos nga si Moloch, nga gilarawan duolan 75 ka tuig kanhi diha sa “Photo-Drama of Creation”
Presenteng-adlawng Walog sa Hinnom, nga nagabantaaw sa sidlakan