Malig-ong Manlalaban sa Kamatuoran
GITAPOS ni Martin Poetzinger, membor sa Nagamandong Lawas sa mga Saksi ni Jehova, ang iyang yutan-ong kurso ingong dinihogang Kristohanon sa sayong gabii sa Huwebes, Hunyo 16, 1988. Nagkasakit na siya sa dugay-dugay nang panahon apan namatay nga walay gibating kasakit sa Brooklyn Bethel. Ang iyang asawa, si Gertrud, diha sa iyang kiliran sa tibuok panahon sa iyang pagsakit.
Natawo si Igsoong Poetzinger sa Hulyo 25, 1904, sa Munich, Alemanya. Gibawtismohan siya sa Oktubre 2, 1928, ug misulod sa pag-alagad ingong payoner sa Oktubre 1, 1930. Sa tinghunlak sa 1933, gitudlo siya sa Watch Tower Society sa pagdumala sa intereses sa Gingharian sa Bulgaria, apan sulod sa usa ka tuig ang mga Saksi nga dili-lumad sa nasod gipalagpot. Ang sunod nga giadto ni Igsoong Poetzinger mao ang Hungaria. Sayop nga gidakop ug gipalagpot niadtong nasora, gitudlo na usab siya sa pagdumala sa usa ka grupo sa mga payoner sa Yugoslavia. Human sa grabeng sakit, naospital siyag dugay sa Zagreb, siya mibalik sa Alemanya.
Si Brother ug Sister Poetzinger naminyo sa 1936, apan niadto mismong tuiga gipadala siya sa kampong konsentrasyon tungod sa pagdumili sa pagsalikway sa iyang paguto. Ang iyang asawa nabilanggo sa laing dapit, apang gipadala siya sa Dachau ug dayon sa kampo sa mga patyonon sa Mauthausen, sa Upper Austria. Didto gipagutman sila sa Gestapo, ug kanunay gibunalan, ug nag-antos sa dili-mabatbat nga kabangisan sa paghaylo kaniya ug sa ubang mga Saksi sa pagbungkag sa ilang integridad kang Jehova nga Diyos. Apan si Igsoong Poetzinger nagpabilin sa pagtuo.
Human sa siyam ka tuig nga pagkabilanggo, nagkabalik si Brother ug Sister Poetzinger sa 1945. Human niini, misugod siya sa pag-alagad sa sirkitong buluhaton sa Alemanya, ug sa ulahi si Gertrud mibiyahe uban niya, madasigon sa pag-alagad sa kanataran samtang nag-alagad siya sa mga kongregasyon. Sa 1958 mitambong siya sa Watchtower Bible School of Gilead, ug sa iyang pagbalik sa Alemanya, siya ug ang iyang asawa nagpadayon sa nagapanawng buluhaton hangtod nga misulod sila sa pag-alagad sa Bethel didto sa 1977. Sa Septiyembre 1977, gitudlo si Igsoong Poetzinger sa Nagamandong Lawas ug maoy hinungdan nga nakaadto sa hedkuwarter sa kalibotan sa Sosyedad sa Brooklyn, New York, mga kapin sa usa ka tuig sa ulahi. siya nag-alagad uban sa Komite sa Departamento sa Pag-alagad.
Si Igsoong Poetzinger maoy usa ka maisogong manlalaban sa kamatuoran. Ang iyang pagkamaunongon ug ang madasigong pagsuportar sa organisasyon ni Jehova ug sa buluhaton sa Gingharian sa tinuod maoy usa ka maayong pananglitan. Busa kami masaligon nga usa siya nga kining mga pulonga aplikado: “Malipayon ang mga patay nga nangamatay diha sa Ginoo. . . Oo, nag-ingon ang espiritu, . . . ang ilang binuhatan mokuyog uban kanila.”—Pinadayag 14:13.
[Hulagway sa panid 31]