Aids—‘Sinugdanan sa Usa ka Bag-ong Moralidad’?

TAPOS sa pagpunting nga ang usa ka medikal nga doktor miingon nga “ang bug-os usag-kapikas nga relasyon” mao ang bugtong paagi sa paglikay nga hitakdan sa AIDS sa seksuwal nga paagi, ang usa ka Canadianong editoryal nga manunulat nangutana: “Ang gikalisangang AIDS mao kaha ang sinugdanan sa bug-os bag-ong moralidad sa atong kalibotan?” Ang manunulat nahibulong, usab, kon kaha dili “katingad-an” nga ang gitudlo sa Bibliya sa katuigan, nga mao, ang monogamiya o usag asawa o bana, “karon maoy butang maylabot sa kaluwasan sa katawhan.” Sa pagtumong usab sa kalibotan karong adlawa sa “mga droga, tabako, alkohol ug dili labing menos, pagkasobrang hilig sa sekso,” ang editoryal nagaingon: “Karon kita nagabayad sa bili tungod sa pornograpiko, mahilayon, nagahugaw nga kalibotang atong gimugna.”

Bisan tuod maayo nga molaom sa kauswagan sa kagawian ug alang sa kaluwasan, ang kahadlok ba lamang sa sayo nga pagkamatay o ang kalaglagan sa katawhan ang magpatunghag “bug-os bag-ong moralidad”? Dili, kay bisan pa sa mga pasidaan gikan sa mga doktor ug mga tigdukiduki, ang kadaghanang hinabako ug hinginom sa alkohol sa binuang nagapadayon sa pag-abusar sa ilang panglawas, nga nagadala sa ilang mga kinabuhi sa ahat nga kataposan. Ug ang pila ka homoseksuwal nag-ingon nga magpadayon sila uban sa daghang kapikas bisan sa kapeligrohan nga matakdan sa AIDS.​—Proverbio 10:21, 23.

Nan, unsay tukmang mopugong sa buhat nga daotan? Sa pagkamatuod, ang tukmang kahadlok ug pagtahod kang Jehova, nga makita diha sa pagkamasinugtanon sa iyang mga kasugoan sa moralidad. “Ang kahadlok kang Jehova mao ang sinugdanan sa kahibalo.” Ug kining matanga sa kahibalo nagapatungha sa kaalam nga tinuod “nagatipig nga buhi sa mga tag-iya niini.”​—Proverbio 1:7; Ecclesiastes 7:12.

Makahuloganon, ang editor, sa pag-ingon nga ang AIDS basin makuha pinaagig abuno sa dugo, nangutana usab: “Dili ba katingad-an nga kita nga sa bug-os nagsaway sa mga Saksi ni Jehova tungod sa pagdumili sa mga abuno sa dugo . . . tingali karon nagahimo sa samang butang tungod sa laing mga hinungdan?”