Ang Kagubot Dili Makapahunong sa Maayong Balita
USA ka adlaw sa miaging Pebrero, ang dugay nang gihulat sa Venezuela nga bag-ong plano sa ekonomiya gisibya. Ang mga prisyo gipatas-an ug kapin sa 100 porsiento sa pangunang mga palalitong pagkaon sama sa gatas, harina, ug tinapay. Ang prisyo sa gasolina misaka sa 90 porsiento. Ang plete sa transportasyon giuyonan nga pasakaan ngadto sa 30 porsiento. Ang nasod nakurat. Sa kalit, sa Lunes, sa Pebrero 27, mireaksiyon ang mga tawo pinaagi sa tibuok-nasod sa kagubot.
Sa pagkasunod buntag, ang kahimtang midangat sa grabeng kagun-oban ug panglungkab. Ang mga butok sa posil milanog sa daghang dapit. Ang mga batan-on ug tigulang nanghugpa sa mga karsada sa mga siyudad, nagbilin ug agi sa kalaglagan nga kaamgid nianang giagian sa gubat.
Niadtong hapona ang presidente sa nasod mideklarar ug emerhensiya sa nasod ug gisuspende ang mga garantiya sa konstitusyon sa napulo ka adlaw. Gisugdan ang kurpiyo sa mga oras sa alas 6:00 s.g. ug sa alas 6:00 s.b. Sa pagkasunod adlaw, ang ministro sa depensa misibya nga ang kurpiyo magpadayon hangtod nga ipahibalo. Gigamit sa militar ang awtoridad niini sa paggahom sa kadalanan, nagapanulod sa mga balay nga walay awtorisasyon, ug gipahunong ug girekisa ang mga tawo. “Duha ka gatos ang nangamatay ug usa ka libo ang nangasamdan sa tulo ka adlaw sa kagubot,” mitaho ang usa ka peryodiko.
Unsa may lakat sa mga kongregasyon sa mga Saksi ni Jehova sa panahon sa krisis? Ang mga igsoon gitambagan: Magmaalamon ug likayi ang magubot nga mga lugar. Usba ang mga oras sa miting aron masunod ang kurpiyo, ug ayaw pagsangyaw sa dagkong mga grupo. Bisan pa, ang pagsangyaw sa maayong balita sa Gingharian sa Diyos nagpadayon.—Mateo 24:14; 28:19, 20.
Tungod kay nabalaka ang dili-magtutuong bana sa kaayohan sa usa ka Kristohanong babaye kon siya mogawas sa balay aron sa pagsangyaw, iyang gidid-an siya sa paglakaw. “Wala ka makasabot nga ako adunay obligasyon nga pagatumanon,” gisultihan niya ang iyang bana. “Buweno! Ako na lay tun-i sa Bibliya!”
Kini ang unang higayon sulod sa 22 ka tuig sa babaye ingong Saksi nga ang iyang bana mipahayag nga andam sa pagtuon sa Bibliya. Apan ang iyang bana mipasidaan: “Sige, basta manaad ka nga dili ka mogawas. Apan ayaw ako pangutan-a, basahi lang ako.” Busa, gitun-an siya sa sister sulod sa usa ka oras ug tunga. “Usa kadto ka modelo nga pagtuon, ang labing maayong pagtuon nga akong nahimo sa akong 22 ka tuig sa kamatuoran,” siya miingon, samtang mitulo ang mga luha gikan sa iyang mga mata.
Sa laing kaso, usa ka regular payunir nanilhig sa daplin sa dalan sa gawas sa iyang balay sa dihang giduol siya sa usa ka babaye kinsa sa kasagaran dili mamati sa mga Saksi sa dihang sila moduaw sa iyang balay. “Wala ako makakita kanimo nga nagsangyaw sa pipila ka adlaw nga milabay,” miingon ang babaye. “Ayaw ako ug ingna nga dili ka na mosangyaw!”
Gipatin-aw sa sister nga mihunong sila sa pagsangyaw sa balay-ug-balay tungod lamang sa kagubot. “Apan moabot ra ang adlaw nga dili na kami mosangyaw pa sa mga tawo, ug kana magkahulogan sa kataposan sa kalibotan,” miingon ang sister. “Maayong imong pahimuslan ang higayon karon ug dawata ang pagtuon sa Bibliya diha sa imong balay.”
“Kanus-a man kita makahimog kahikayan?” dalidaling nangutana ang babaye. Dihadiha gihimo ang mga kahikayan sa pagsugod sa pagtuon sa Bibliya sa balay.
Sa mapasalamaton, mihunong ang kagubot, nga nakahimo sa mga kalihokan sa nasod sa pagbalik sa normal. Bisan pa, niining malisod nga mga kahimtang, makapalipay ang pagkasayod nga sa dili madugay usa ka bag-ong kalibotan sa kalinaw ug kasegurohan ang moabot dinhi. Ang Pulong sa Diyos nagsaad: “Adunay bag-ong mga langit ug usa ka bag-ong yuta diin nagapuyo ang pagkamatarong.” (2 Pedro 3:13) Samtang tugotan pa ni Jehova, ang mga Saksi ni Jehova magpadayon sa pagsangyaw sa maayong balita sa Gingharian.
[Mga hulagway sa panid 31]
Ang kagubot wala makapahunong sa mga magwawali sa Gingharian