“Kanang Babaye nga si Jezebel”
“ADUNA akoy ikasumbong batok kanimo, nga imong gipasagdan kanang babaye nga si Jezebel, nga nagaingon nga siya propeta, ug siya nagapanudlo ug nagapahisalaag sa akong mga ulipon sa paghimog pakighilawas ug sa pagkaon sa mga hinalad ngadto sa mga diyosdiyos.” (Pinadayag 2:20) Kana ang giingon ni Jesus ngadto sa Kristohanong mga ansiano sa Tiatira. Ang kongregasyon aktibo kaayo ug nagpadayag sa gugma, pagtuo, ug pagkamainantoson. Apan gipasagdan niini ang makadaot nga impluwensiya ni Jezebel. Ngano? Ug mahimo bang mahitabo ang maong butang karong adlawa?—Pinadayag 2:19.
Lagmit, walay mausa sa Tiatira ang aktuwal nga ginganlag Jezebel. Gigamit ni Jesus ang ngalan sa paghinumdom kanato sa makasaysayanhong Rayna Jezebel, ang asawa ni Haring Ahab. Kadtong gahig-ulong babaye bug-os nagdaot sa katawhan sa Diyos sa dihang gipailaila niya ang imoral nga pagsimba kang Baal sa Israel, nga nakigbisog sa hugot nga pangampanya sa pagpapas sa maputling pagsimba.—1 Hari 16:31-33; 21:1-7.
Ang Jezebel sa Tiatira—mahimong usa ka babaye o grupo sa mga babaye—susamang nagdasig sa imoralidad ug pagsimbag diyosdiyos taliwala sa katawhan sa Diyos. Ang pipila sa kongregasyon namati kaniya, sanglit si Jesus naghisgot bahin sa “iyang mga anak,” lagmit iyang mga sumusunod. (Pinadayag 2:22, 23) Ang iyang impluwensiya nakapameligro sa kongregasyon sa Tiatira nga mahimong daotan sama sa Israel sa adlaw ni Ahab.
Nganong si Jezebel sa Tiatira impluwensiyado kaayo? Sa pagtan-aw sa kasamahan kang Jezebel sa karaan, ang pipila naghunahuna nga siya ang asawa sa iladong ansiano sa Tiatira. Ang Bibliya, hinuon, wala magsulti niana. Lagmit kaayo, ang iyang kusganong personalidad ug ang kamatuorang siya nag-ingon nga siya propeta naghatag kaniyag pagkamadungganon diha sa kongregasyon.
Gipaila nga ang daotang mga buhat nga iyang gipasiugda may kalabotan sa mga kapunongan sa negosyo. Sumala kang Dr. W. M. Ramsay, “mas daghang kapunongan sa negosyo ang nasayran sa Tiatira kay sa ubang siyudad sa Asia.” Niini kanila, ang The Interpreter’s Dictionary of the Bible nagaingon: “Ang matag usa sa maong kapunongan may kaugalingong patron nga diyos, iyang mga piyesta, iyang sosyal nga mga okasyon nga usahay mahimong imoral nga mga paghudyaka. ‘Si Jezebel’ mahimong nakig-ergo nga . . . ang maong mga paghudyaka dili kinahanglang sawayon sanglit ang matag mamumuo, aron makapangabuhi, kinahanglang moduyog sa usa ka kapunongan.” Uyon niini ang The Expositor’s Greek Testament, nga nagpaila nga kadtong nagsunod kang Jezebel “nagpasigarbo sa ilang nalamdagan nga pagkaliberal.”
Sa pagkamatuod, ang pagtulon-an ni Jezebel sa Tiatira nahisama sa “pagtulon-an ni Balaam” sa Pergamo. (Pinadayag 2:14) Ang kongregasyon sa Pergamo nag-antos ug dakong paglutos, apan ang pipila didto nagsundog kang Balaam sa karaan sa pagpasiugda sa pakighilawas ug sa pagsimbag diyosdiyos. Gipasabot nga sa Pergamo, ang impluwensiya ni Balaam nagdasig sa pagkompromiso aron malikayan ang mapintas nga paglutos, samtang sa Tiatira si Jezebel nagdasig sa pagkompromiso tungod sa mga hinungdang maylabot sa pangabuhi. Bisan unsa ang kahimtang, ang duruha ka pagtulon-an maoy makapatay nga apostasiya.
Ang Jezebel—o Balaam—nga impluwensiya mahimo bang maglungtad karong adlawa? Oo, mahimo. Daghang pangulo sa Kakristiyanohan nagasundog kang Jezebel sa pagtugot diha sa ilang mga kongregasyon sa aktibong homoseksuwalidad, pakighilawas, panapaw, aborsiyon, ug sa susamang mga butang gitunglo sa Diyos. Bisan sulod sa Kristohanong kongregasyon, ang pila ka indibiduwal nagpasiugda sa “paghimong liberal” sa matuod nga pagsimba, nga nagadasig sa mga Kristohanon nga dili estriktong mosunod sa mga sukdanan sa Bibliya ug nagapasiugda pag imoralidad.
Ang tanan nga gustong magpahimuot kang Jehova angay molikay sa maong mga ideya, bisan pag sila ipresentar sa mga indibiduwal—mga lalaki o mga babaye—nga may makadani o kusganong mga personalidad. Kining panghunahunaa makapatay karong adlawa sama ra sa unang siglo.—Pinadayag 2:22, 23.