Mga Magmamantala sa Gingharian Nagtaho

Sila Misalig Kang Jehova

ANG mga Saksi ni Jehova gisugo ni Jehova sa pagsangyaw sa maayong balita sa Gingharian sa tibuok nga kalibotan aron ang mga tawo sa tanang nasod makabatog higayon nga mahibalo mahitungod sa bag-ong kalibotan sa Diyos. Sa pila ka nasod, kasagaran sa pagsiba sa klero sa Kakristiyanohan, ang atong buluhaton gipiotan. Kana ang kahimtang sa usa ka nasod sa Aprika. Apan ang mga Saksi ni Jehova didto nagbuhat sa gibuhat ni Haring David. Siya miingon: “Gibutang ko ang akong pagsalig sa Diyos. Dili ako mahadlok.” (Salmo 56:11) Ang mga kasinatian sa atong mga igsoon sa maong yuta nagpakita nga sila nagasalig kang Jehova ug nagapadayon sa iyang hinungdanong buluhaton.

Ang usa ka Saksi nga nagtrabaho ingong usa ka prinsipal sa usa ka eskuylahan miinsistir sa pagsugot sa “Diyos ingong magmamando inay sa mga tawo,” nga nagpahayag sa iyang pagkaneyutral bahin sa mga kahikayan sa Estado. (Buhat 5:29) Siya grabeng gibun-og ug gidahom nga mahukman nga usa ka traidor. Ang tanan naghunahuna nga siya patyon. Bisan pa niana, ang Saksi misalig kang Jehova. Siya nagpabiling matinumanon ug mipatin-aw sa mga hinungdang maylabot sa konsensiya sa iyang baroganan. Ang resulta? Siya nahukman nga dili sad-an ug gibalik ngadto sa iyang lungsod, nga niana ang mga tinugyanan sa Estado nga nagbun-og kaniya nangayog pasaylo. Kining matinumanong Saksi gipabalik sa pagkamagtutudlo ug giuswagan ngadto sa posisyong inspektor sa mga eskuylahan!

Ang koordinetor sa usa ka eskuylahan nagpapahawa sa usa ka Saksing magtutudlo. Usa ka bulan sa ulahi ang maong koordinetor midawat sa librong Ikaw Mabuhing Walay Kataposan sa Paraiso sa Yuta gikan sa usa ka espesyal payunir ug misugot nga magtuon sa Bibliya. Human matapos ang kapitulo 6, siya miluwat nga koordinetor sa eskuylahan, ug siya ug ang iyang asawa misugod sa pagtambong sa tanang tigom sa mga Saksi ni Jehova. Usa ka buntag sa Dominggo ang gipapahawang magtutudlo natingala gayod sa pagkatagbo sa tawong nagpapahawa kaniya ug sa pagkasayod nga siya nagsubay na sa dalan sa pagkahimong usa ka espirituwal nga igsoon.

Ang laing kasinatian gikan sa mao mismong nasod nag-ilustrar sa unsang paagi ang mga Saksi ni Jehova nagasilsil ug pagtahod alang sa mga kahikayan ni Jehova ug sa pagpanlimbasog nga mahuptang hinlo ang organisasyon. Usa ka espesyal payunir nga nagsangyaw sa nalain nga teritoryo nakasinatig dakong pagsupak. Sanglit siya gikan man sa laing tribo ug rehiyon, ang mga kaaway sa kamatuoran buot magpalagpot kaniya gikan sa balangay. Bisan pa niana, gipunting sa hepe sa balangay ang iyang maayong panggawi ug ang maayong sangpotanan sa iyang ministeryo ug dili motugot nga siya ipalagpot. Namatikdan sa hepe nga sukad sa pag-abot sa espesyal payunir, ang mga tawo nagpasidungog sa mga magmamando pinaagi sa pagbayad sa ilang buhis ug paggama sa karsada sa komunidad kas-a sa usa ka semana.​—Roma 13:1, 7.

Unya, usa ka gabii ang laing Saksi nasakpan nga naghimo sa pagpanapaw uban sa dili-Saksing babaye. May eskandalo, ug ang espesyal payunir gipatawag sa atubangan sa hepe, kinsa nagkasaba kaniya, nga nag-ingon: “Ania ang inyong igsoon nga nasakpan nga naghimo sa panapaw. Kamong mga Saksi walay kalainan sa ubang mga relihiyon.” Hinunoa, mipatin-aw ang espesyal payunir: “Bisan tuod dili hingpit, kami lahi sa ubang mga relihiyon kay kami dili mokonsentir sa mga buhat niadtong nagahimog grabeng mga sala.”

Ang Saksi nga nanapaw misilbi sa usa ka sentensiya sa bilanggoan ug mibayad ug multa. Dugang pa, siya gipalagpot gikan sa kongregasyon ingong dili-mahinulsolong mamumuhat ug daotan. Ang maong buhat nakapahingangha sa hepe ug nagtak-om sa mga baba niadtong nagtamay sa mga Saksi ni Jehova. Ang hepe mikomento: “Ayaw ninyog daota ang mga Saksi ni Jehova. Sila nagbaton sa kamatuoran. Ang maong aksiyon wala himoa sa ubang mga relihiyon.”

Ang matinumanong mga Saksi sa maong yuta nagasunod sa tambag sa Salmo 37:3: “Salig kang Jehova ug buhata ang maayo; magpuyo sa yuta, ug magmatinumanon.” Mosalig ba kita kang Jehova sama niining maong mga Kristohanon?