Ikapanghimakak ba sa Siyensiya ang mga Milagro?

Tinuod bang nahitabo ang mga milagro sa Bibliya? Adunay daghan, apil ang ubay-ubay siyentipiko ug relihiyosong mga lider, nga motubag dili. Gibati nila nga ang pagtuo sa mga milagro maoy iya sa mas matuotuohong panahon ug gipanghimakak sa modernong siyensiya ang posibilidad sa pagkahitabo niini nila. Busa, ang mosunod nga sulat nga gipatik diha sa The Times sa London ug gipirmahan sa ubay-ubay nga siyentipiko takos matikdan. Kini nagaingon:

“Dili angay gamiton ang siyensiya ingong usa ka argumento batok sa mga milagro. Ang pagtuo nga dili mahimong mahitabo ang mga milagro maoy usa ka buhat sa pagtuo lamang sama ra sa pagtuo nga sila mahimong mahitabo. . . . Ang mga milagro maoy mga hitabo nga wala pay kasama. Bisan unsa man ang mga uso karon sa pilosopiya o tingali ipaila sa mga pagpadayag sa mga surbi sa opinyon, hinungdanon ang pagpanghimatuod nga ang siyensiya (nga gipasukad sa pagpaniid sa mga naunang nahitabo) walay ikaingon bahin sa ulohan. Ang ‘mga balaod’ niini mao lamay mga katibuk-ang pahayag sa atong kasinatian. Ang pagtuo nahisandig sa ubang mga pasikaranan.” (Italiko amoa.) Sa pagkamatuod, walay paagi nga ang modernong siyensiya makapanghimakak sa mga asoy sa mga milagro nga nahitala diha sa Bibliya.