Ang Pagmata! Nakatabang sa Pagdaog ug Premyo sa Italya
Sa miaging tuig ang usa ka diyes-anyos nga batang babaye nga nagtungha pa sa Italya misulat ug usa ka komposisyon bahin sa tema nga “Kon Makasulti Unta ang Yuta.” Ang tema gihan-ay ingong pagkabildohay tali sa yuta ug sa usa ka bata nga nangutana sa yuta nganong kini naghilak. Ang batang babayeng nagtungha mipatin-aw:
“Ang yuta mitubag nga kini nahugawan sa anuos nga nakapatunghag greenhouse effect. Ang yuta nagpadayon sa pagpakigsulti sa bata ug miingon nga sa dili madugay mausab ang kahimtang ug ang kaugmaon niini mahimong mas maayo, bisan pa sa tawo. Ang paglaom sa yuta maoy diha sa Diyos nga Labing Gamhanan, ang Maglalalang niini, kinsa wala maglalang sa yuta sa walay kapuslanan kondili aron kini pagapuy-an.—Isaias 45:18.”
Ang batang babaye nga nagtungha sa dugang miingon: “Gikuha nako ang impormasyon gikan sa mga magasing Pagmata! nga Hulyo 22, 1989; Septiyembre 8, 1989; ug Septiyembre 22, 1989. Tungod sa maong mga magasin, ang akong tema nakadaog sa unang premyo. Ang ikaduhang premyo nadaog sa usa sa akong mga klasmet kansang inahan maoy suki sa magasin sa akong inahan. Gikuha usab niya ang impormasyon gikan sa samang mga magasing Pagmata!
“Ako nagpasalamat kaninyo tungod niining maayo ug tukma ug yano usab nga impormasyon nga makahimo namong maalamon. Ang premyo nga akong nadaog maoy mga 100,000 lire [mga $100, U.S.], ug gipadala ko ang maong kuwarta aron magamit sa pagpatik ug dugang mga magasin.”
Gibati namo nga bisan unsa ang imong relihiyosong pagtuo, ikaw makabaton usab ug kaayohan gikan sa makaikag nga mga artikulo diha sa Pagmata!
Buot kong masayod sa unsang paagi ang magasing Pagmata! mapadala sa akong balay. (Pagsulat sa direksiyon sa ubos alang sa impormasyon. Sa gawas sa Pilipinas, pagsulat sa sangang-buhatan sa Watch Tower alang sa impormasyon. Tan-awa ang panid 2.)