“Ang Gahom nga Labaw sa Kasagaran”
UNSA ka dakong kalisod ang maantos sa usa ka Kristohanon? Karong adlawa, ang mga Kristohanon sa tibuok kalibotan nagaatubang sa kawalad-on, pagkabungkag sa pamilya, emosyonal nga kasakit, balatian, mga gubat, ug paglutos. Makataronganon ba sa pagdahom kanila sa paghupot sa integridad bisan pa niining tanan? Si apostol Pablo nag-ingon nga oo. Siya misulat: “Alang sa tanang butang ako nakabatog kusog tungod kaniya nga nagahatag ug gahom kanako.”—Filipos 4:13.
Ang kasaysayan nakapakita nga ang kusog gikan ni Jehova sa pagkamatuod paigo alang sa tanang butang. Pananglitan, sa panahon sa pagmandong Nazi sa Alemanya, ang mga Saksi ni Jehova nag-antos sa mapintas nga paglutos. Sila ba nakalahutay? Ang librong Les Bibelforscher et le nazisme (Ang mga Estudyante sa Bibliya ug ang Nazismo) nagsaysay: “Bisan sa tanang pagbunal, panghulga, ug pagbando, bisan pa sa publikong pagpakaulaw, pagbilanggo ug pagbalhog diha sa mga kampo konsentrasyon, ang mga Estudyante sa Bibliya [mga Saksi ni Jehova] wala motugot sa ilang kaugalingon nga ‘maedukar pag-usab.’”
Diha sa mga kampo konsentrasyon, ang mga Saksi nailhan pinaagi sa gamay purporang triyanggulo diha sa ilang mga bukton sa sinina ug gilahi alang sa linaing kabangisan. Kini ba nakabungkag kanila? Ang sikologong si Bruno Bettelheim nag-ingon nga sila “wala lamang magpakitag dili kasagarang gihabogon sa tawhanong dignidad ug moral nga pamatasan, apan morag gipanalipdan batok sa samang kasinatian sa kampo nga sa madali nakadaot sa mga tawong giisip nga labing lig-on sa akong sikoanalitiko nga mga higala ug nako mismo.”
Oo, sila dunay ‘kalig-on alang sa tanang mga butang.’ Ngano? tungod kay sila nagasalig kang Jehova. Si Pablo nag-ingon: “Kami nagbaton niining bahandi diha sa mga panudlanan nga hinimog yuta, aron ang gahom nga labaw sa kasagaran maiyaha sa Diyos ug nga dili magagikan kanamo.” (2 Corinto 4:7) Kon ikaw makasugamak sa masulayong kahimtang, tan-aw nga masaligon kang Jehova alang sa tabang. Kay gipalig-on pinaagig gahom nga labaw sa kasagaran nga iyang ginahatag, ikaw makaarang sa pag-antos.—Lucas 11:13.