Labaw pa kay sa Makaiikag nga mga Haligi

Ang mga bisita naikag sa mga haligi sa Dagat Mediteraneo sa Cesarea, usa ka karaang pantalan sa baybayon sa Israel. Gitukod ni Herodes nga Bantogan kining maong dunggoanan ug gingalan ang siyudad sa pagpasidungog kang Cesar Agosto.

Gikalot sa mga arkeologo ang dakong bahin sa siyudad, apil ang dakong ampiteyatro niini. Ilang gisusi usab ang ilalom sa dagat aron makabaton ug pagsabot kon giunsa pagtukod ang pantalan diha sa balasong babayon.

Gitaho sa The New York Times (Enero 8, 1991) ang kaplag sa mga haligi sa mga kagun-oban sa usa ka palasyo nga misiwil niadto sa dagat. Kini maoy talagsaon tungod kay may mga kinulit diha niana nga nagngalan ug pipila ka Romanong mga gobernador nga wala niadto hiilhi. Ang “tigbantay” sa mga barko gihisgotan usab, nga “mao ang unang kinulit nga nakaplagan sukad maylabot sa dunggoanan.”

Ang mga estudyante sa Bibliya nahibalo nga gibiyahe ni apostol Pablo kini nga pantalan sa hinapos sa iyang duha ka misyonerong panaw. Dinhi siya miestar uban kang Filipe nga ebanghelisador, ug ang iyang mga eksperyensiya nakadasig gayod sa mga disipulo. (Buhat 18:21, 22; 21:7, 8, 16) Atong mabasa ang daghan niining makawiwili nga mga eksperyensiya diha sa basahon sa mga Buhat.

Busa kini nga mga haligi diha sa baybayon dili kay walay-pulos nga mga nahibilin sa kasaysayan. Kini magpahinumdom sa mga Kristohanon sa ilang unang mga igsoon, kinsa aktibong nagpakaylap sa maayong balita sa mga dunggoanan ug “ngadto sa kinatumyang bahin sa yuta.”—Buhat 1:8.

[Picture Credit Line sa panid 32]

Garo Nalbandian