Ang Relihiyon sa ‘Manunutong Pagtuo’
“Ang katakos sa Mormonismo sa pagbaton ug sukaranan sa liberal nga mga demokrasya ug diha sa totalitaryanismong mga katilingban kahibulongan.” Kana ang giingon sa The Wall Street Journal sa dihang ang kagamhanang Hungariano naghatag ug bug-os nga pag-ila sa Church of Jesus Christ of Latter-day Saints. Sa unsang paagi kini nakab-ot sa simbahan? “Ang yawi,” sumala sa Journal,” dili lamang tungod sa taas nga kabad sa pagpanganak sa mga Mormon o sa agresibong pagpakaylap sa ilang maayong balita. Inay, mao ang kamanunuton nga dala sa ilang pagtuo.” Sa unsang paagi?
Kon pagahisgotan ang yugto sa wala pa ang bag-ong mga kausaban sa politika sa Sidlakang Uropa, ang Journal nag-ingon: “Ginamit ang mga grupo sa musikero ug sayaw-balangayon gikan sa Unibersidad sa Brigham Young, ang mga Mormon nakaarang sa paglikay sa mga pagpit-os ug kawalay-kooperasyon nga sagad giatubang sa mga misyonaryo sa kadaghanang Komunistang mga nasod,” matud sa Journal. Ang ilang mga troupe nakaabot sa Romania, Czechoslovakia, Hungaria, Polandia, Rusya, ug Tsina, maingon sab ngadto sa Saudi Arabia, Libya, Ehipto, Jordan, Somalia, ug Israel. Dugang pa, “ang bahandi sa Simbahang Mormon gigamit ingong suporta sa pagsulod ngadto sa Marxista ug mga nasod sa Ikatulong Kalibotan.” Ang pagtukod ug paambakan ug well-drilling maoy lakip sa daghang mga proyekto nga gisuportahan sa mga donasyon sa Mormon.
Sa karong adlawa nga kamahigugmaon-sa-kalingawan ug kahangol-sa-salapi sa kalibotan, dili ikatingala nga ang samang awit-ug-sayaw ug bukas-palad nga mga taktika may kusganong pangdani. (2 Timoteo 3:2, 4) Apan ang tinuod nga mga samag-karnero madani sa tingog sa Maayong Magbalantay, si Jesu-Kristo. (Juan 10:27) Mao nga, sa dihang iyang gisugo ang iyang mga sumusunod sa “paghimog mga tinun-an sa katawhan sa tanang kanasoran,” wala siya mag-ingon nga buhaton kana sa bisan unsang paagi o sa bisan unsang bili apan pinaagi sa ‘pagtudlo kanila sa pagtuman sa tanang butang iyang gisugo.” (Mateo 28:19, 20) Sa pagtuman niining sugo, walay luna sa pagkompromiso sa mga sukdanan sa Bibliya.