Mga Gabaonhon—Sila Nangitag Kalinaw
ANG siyudad sa ibabaw sa bungtod nailhan ingong mao ang dapit nga nahimutangan sa karaang Gabaon, mga 10 kilometros amihanan sa Jerusalem.
Tingali nasayod ka nga ang Gabaon naila human nga nanguna si Josue sa mga Israelinhon sa pagsulod sa Yutang Saad ug sa pagpukan sa Jericho. Ang mga Canaanhon sa Gabaon nakaamgo nga sila dili makadaog batok sa Israel, kinsa sa dayag gipaluyohan sa Diyos. Unsay angay nga buhaton? Midangop sa paglingla, ang mga Gabaonhon nagpadalag mga hawas nga nagtakobang mga biyahedor gikan sa halayong yuta. Kini nga paningkamot alang sa pakigdait milampos, kay ang Israel mihimog pakigtugon uban kanila. Sa nahibaloan ang ilang paglingla, ang mga Gabaonhon nahimong mga mangangahoy ug mga mangangalos ug tubig.
Hayan ang Diyos wala masuko niining mga tawhana nga nangitag kalinaw. Iyang gitabangan ang pagpanalipod ni Josue sa mga Gabaonhon sa dihang sila giatake sa lima ka hari. Si Jehova gani mihimog milagro sa pagpalugway sa kahayag sa adlaw alang sa maong gubat.—Josue 9:3-27; 10:1-14.
Ang mga tigkalot nakakaplag niining bungtora ug usa ka lalom nga lungag, o linaw, nga tinabas sa gahing bato. Ang mga Gabaonhon makakanaog sa mga ang-ang niini ug sa pagkuhag tubig gikan sa lungib sa ilalom sa yuta. Mao ba kaha kini “ang linaw sa Gabaon” nga gihisgotan sa 2 Samuel 2:13? Ang mga arkeologo nakadiskobre usab ug mga pensa nga tinabas diha sa bato ug daghang kahimanan sa paggamag-bino. Oo, daw ang Gabaon maoy usa ka sentro sa paggamag-bino.
Sa panahon ni David ang tolda, o tabernakulo, sa matuod nga Diyos nahimutang dinhi. Si Haring Solomon mianhi dinhi sa pagtanyag ug mga halad. Si Jehova mipakita kang Solomon diha sa usa ka damgo ug gisaaran siya nga hatagan ug “usa ka maalamon ug masinabotong kasingkasing,” ug mga bahandi usab. (1 Hari 3:4-14; 2 Cronicas 1:3) Ang artikulo sa mga panid 12-17 niining isyuha nagpakita nga ang kaliwatan sa katawhan nga nagpuyo dinhi sa Gabaon nakabatog linaing pribilehiyo taliwala sa nasod sa Diyos sa ulahing panahon. Nasayod ka ba kon sa unsang paagi?
[Picture Credit Line sa panid 32]
Pictorial Archive (Near Eastern History) Est.