“Samag Usa ka Leon nga Nagangulob”
NAGATUO ka ba nga si Satanas naglungtad? Karong adlawa, daghan ang dili motuo. Morag ilang gilantaw ang maong pagtuo ingong “dili-siyentipikanhon.” Ngani balik niadtong 1911, ang Encyclopædia Britannica nag-ingon: “Ang siyensiya nagpatin-aw na pag-ayo sa daghang mga proseso sa dayag nga kinaiyahan ug sa kahiladman sa kinabuhi sa tawo nga wala nay luna nga gibilin alang sa Satanikong ahensiya.” Ang mga teologo nangatarongan nga si Satanas mao lamay usa ka simbolo, usa ka tumotumo. Ang The World Book Encyclopedia nag-ingon: “Daghang modernong mga teologo nag-isip sa Yawa nga usa ka simbolo sa gahom sa kadaotan, sa kinamaotang mga hiyas sa tawhanong kinaiya.”
Ugaling, unsa naman ang mga kamatuoran? Kon ikaw nagtuo sa Bibliya, kinahanglan kang motuo nga si Satanas maoy tinuod. Si Jesus wala lamang mituo nga siya naglungtad apan nagtawag kaniya nga “ang magmamando sa kalibotan.” (Juan 14:30) Si apostol Pablo nagtawag kang Satanas nga “ang diyos niining sistema sa mga butang.” (2 Corinto 4:4) Ug ang tigulang nang apostol nga si Juan nag-ingon: “Ang tibuok kalibotan nahiluna sa gahom sa usang daotan.”—1 Juan 5:19.
Kon dili ka mouyon kang Juan, palandonga ang ulahing kasaysayan. Isipa ang death squads ug ang paggamit ug pagpaantos sa mga kagamhanan. Hinumdomi ang mga gubat ug pagpuo sa mga tawo nga nasaksihan sa atong kaliwatan. Ug komosta naman ang daotang mga salaod nga nahimong ulong-tudling sa atong mga mantalaan—ang pakyaw nga mga pagbuno, panglugos, sigidas nga mga pagpatay, ang seksuwal nga pag-abuso sa mga bata, sa paghisgot lamang ug pipila? Kinsa pa man kondili si Satanas ang diyos niining kalibotana?
Ang Kristohanong apostol nga si Pedro nagpasidaan: “Magmabinantayon kamo. Ang inyong kaaway, ang Yawa, nagalibotlibot sama sa leon nga nagangulob, nga nangitag iyang matukob.” (1 Pedro 5:8) Kon may usa ka leon nga nakabuhi sa inyong kasilinganan, lalisan pa ba ninyo kon kaha kana nagalungtad o wala? O dili ka ba modagan sa pagtago?
Saligi nga si Satanas nagalungtad. Siya walay kaluoy ug daotan, ug siya mas kusgan kay kanato. Busa pagdangop alang sa panalipod sa Usa nga labaw pang kusgan. “Ang ngalan ni Jehova maoy usa ka malig-ong torre. Ang matarong magadalagan nganha niana ug may kaluwasan.” (Proverbio 18:10) Pagpasilong kang Jehova nga Diyos, ug hibaloi nga sa dili madugay ang katawhan mapahigawas na gikan sa impluwensiya nianang daotang usa, si Satanas. Pagka-malipayong kahupayan kana!—Pinadayag 20:1-3.