Mga Misyonaryo sa Micronesia

BISAN pag gibulag sa lagyo kaayong mga distansiya sa maorag way-kinutbanan nga Dagat Pasipiko, ang mga misyonaryo sa Micronesia makaarang gihapon sa pagtigom matag tuig alang sa usa ka “reyunyon sa pamilya.” Ug diin ba magtigom ang maong mga ebanghelista gikan sa lagyong mga kapuloan? Sa kahaom, diha sa dapit nga ginganlan sa lokal nga kagamhanan nga Jehovah Street​—ang adres sa sangang-buhatan sa Guam nga ubos niana nagaalagad sila.

Sa Hunyo 1992, 56 ka misyonaryo nagtapok sa sangang-buhatan aron sa pagtambong sa “Mga Tigdala sa Kahayag” Distritong Kombensiyon. Ang katawa ug sadyang estoryahay milukop sa kahanginan samtang ilang gibag-o ang mga karaang panaghigala ug giugmad ang mga bag-ong panaghigala. Ingong kanunay nga mahitabo, sila naghan-ay sa ilang kaugalingon diha sa hagdan sa Kingdom Hall alang sa ginuropong letrato ug unya nanglingkod sa dapit sa tulo ka tag-as nga lamesa sa kombete aron mokaon sa tinuig misyonaryong pagkaon, nga napalutaw ning tuiga tungod sa pagduaw ni Albert Schroeder, usa ka membro sa Nagamandong Lawas.

Alang sa daghang misyonaryo, kining tinuig nga panagtapok sa Guam mao lang ang ilang higayon sa pagbiya sa ilang gagmay kaayong tropikanhong mga pinuy-anan. Ug tinuod gayong gagmay kaayo sila. Ang Isla sa Ebeye, usa sa Kaislahang Marshall, gilangkoban lamang ug 32 ektarya. Ang Majuro nga misyonaryong balay sa Marshalls ug ang Kiribati nga balay sa Kaislahang Gilbert nahimutang sa tag-as, pig-ot nga mga isla nga walay kilometro sa gisangkaron. Busa gipahimuslan sa labing maayo sa mga misyonaryo ang ilang makapahinam nga biyahe ngadto sa Guam.

Bisan pag romantikong paminawon ang ideya sa pagsangyaw sa usa ka nahilit tropikanhong pulo, sa pagkatinuod kini maoy usa ka hagit nga pipila lamang ang nasangkapan sa pagsugakod. Makaiikag, 7 lamang sa 56 ka misyonaryo ang gikan sa Watchtower Bible School of Gilead. Ang kadaghanan naggikan sa Hawaii o sa Pilipinas diin sila maoy payunir nga mga ministro nga anad na sa kinabuhi sa tropiko, ug mingderetso sila sa pag-adto sa ilang misyonaryong mga asaynment gikan sa kaugalingon nilang mga nasod.

Tungod kay ang kaislahan sa Micronesia nahimutang nga duol kaayo sa ekuwador, ang mga misyonaryo makigbisog sa makapatuok nga kainit ug kaumog aron ipaabot ang maayong balita sa mga molupyo. Ang komunikasyon mahimong labi pang dakong hagit. Ang matag isla o pundok sa mga isla may kaugalingong pinulongan​—ang pipila wala gayod mailhi nga wala gani sila mahitala bisan sa usa ka diksiyonaryo—​ug abtan pa tingalig mga tuig una malarino ang pagsulti sa usa ka bag-ohan. Aron matabangan sa pagsabot sa Bibliya ang katawhan nianang nagkadaiyang mga kultura sa isla, ang sangang-buhatan sa Guam nagapatik ug mga basahon diha sa 11 ka pinulongan, nga 9 niana gigamit sa pagsulti diha lang sa Micronesia.

Ang pila ka isla maoy hilit kaayo nga maabot lamang sila pinaagi sa barko. Ang balayng misyonaryo sa Tol sa Chuuk (Truk) nahimutang sa maong isla, ug ang mga misyonaryo didto nagasalig sa solar panels aron sa pagtaganag koryente sa pila lang ka oras matag adlaw.

Tanantanan, adunay 14 ka balay sa misyonaryo sa tibuok Micronesia, nga nagsakop sa rehiyon nga samag gidak-on sa kontinental nga Tinipong Bansa. Sa kapin sa 400,000 ka tawong nagpuyo sa rehiyon, 1,000 maoy mga magmamantala sa maayong balita, nga organisado sa 20 ka kongregasyon ug 3 ka nalaing grupo.

Bisan pag ang katawhan sa Micronesia kasagaran maoy labihan ka mahigalaon, ang lokal nga mga kustombre sa relihiyon ug pagpit-os sa pamilya magpatab-ang sa daghan gikan sa pagdawat sa kamatuoran sa Gingharian sa Diyos. Busa bisan tuod ang buluhatong pagwali nagmauswagon sa katibuk-an (ang 1,000 ka magmamantala sa Gingharian nagdumalag kapin sa 2,000 ka pagtuon sa Bibliya), ang pila ka kongregasyon ug mga grupo nagpabiling gagmay. Pananglitan, aduna lamay 5 ka magmamantala sa isla sa Tinian, 7 lang ka magmamantala sa isla sa Nauru, ug ang mga kongregasyon sa Yap, Kosrae, ug Rota adunay menos sa 40 ka magmamantala matag usa. Bisan pa niana, ang pila ka misyonaryo nagpabilin sa ilang mga asaynment sulod na sa kapig 20 ka tuig. Dalayegon, ang tanang unom ka misyonaryo sa isla sa Belau dinha na sa labing menos 12 ka tuig.

Alang niadtong moantos, dagko ang mga balos. Adunay matag-adlawng kahigayonan sa pagkahibulong sa katahom sa kalalangan ni Jehova. Ang lunhawng kaislahan sa Micronesia nakatag ingon sa gagmay berdeng mga mahalong bato nga gipaluyohan sa tibuok asulong kadagatan sa Pasipiko. Ang milyamilyang kabaybayonan nga menos ug tawo ug ang katakotang naghitok sa buloknong mga isda nagadani sa mga tig-snorkel ug mga mahiligon sa scuba diving sa pagsiksik sa pipila sa kinanindotang mga dapit salomanan sa kalibotan. Ug pagkatapos sa matag adlaw, anaa ang makapatandog nga talan-awon sa pagsalop sa adlaw diha sa lawod.

Hinuon, ang kinadak-ang ganti mao ang pribilehiyo sa pag-alagad kang Jehova pinaagi sa pagsulti sa uban mahitungod sa iyang kahibulongang mga panaad alang sa umaabot. Tungod kay ang mga misyonaryo sa Micronesia kanunayng nagapangab-ot sa maong ganti, sila nagatuman sa mga pulong sa Isaias 42:12: “Ipahatag nila ang himaya kang Jehova, ug ipapahayag nila bisan ang iyang pagdayeg sa mga pulo.”

[Mapa/​Hulagway sa panid 31]

(Alang sa aktuwal nga pagkahan-ay, tan-awa ang publikasyon)

Barrigada, Guam

Santa Rita, Guam

Koror, Belau

Chuuk (Truk) Islands

Tarawa, Kiribati

Kosrae

Ebeye

Marshall Islands

Majuro

Kolonia, Pohnpei

Songsong, Rota

Saipan

Yap

MICRONESIA

MELANESIA

CAROLINE ISLANDS

PACIFIC OCEAN

PHILIPPINES

NEW GUINEA

EQUATOR

[Hulagway]

Mga misyonaryo nagtapok sa Guam, Hunyo 1992