Katahom nga Dili Molubad

“ANG katahom mohupas; ang katahom moagi,” mipahayag ang magbabalak nga si Walter De la Mare. Kini tinuod gayod sa maanindot kaayong mga bulak sa cactus nga gihulagway dinhi. Ang iyang katahom daling mohupas.

Ang Kristohanong disipulo nga si Santiago misulat: “Sama sa usa ka bulak sa tanaman siya [ang tawong dato] mahanaw ra. Kay ang adlaw mosubang uban sa naglagiting niyang kainit ug ang tanaman malaya, ug ang iyang bulak malarag ug ang katahom sa gawasnong panagway niini mawagtang. Sa ingon usab, ang tawong dato mahanaw sa iyang mga dalan sa kinabuhi.”​—Santiago 1:10, 11.

Niining walay-piho nga kalibotan, ang bahandi mahimong mahanaw sa paglabay sa kagabhion. Dugang pa, ang tawong dato​—sama ra kang bisan kinsa—​maoy ‘mubog kinabuhi, sama sa usa ka bulak.’ (Job 14:1, 2) Si Jesus miasoy sa sambingay sa usa ka tawong napuliki sa pagtigom ug bahandi aron siya makapahayahay ug maglipaylipay. Apan sa dihang gihunahuna niya nga nabatonan na niya ang tanan nga gikinahanglan alang sa kinabuhing hamugaway, siya namatay. Si Jesus nagpasidaan: “Mao man usab sa tawo nga nagatigom ug bahandi alang sa iyang kaugalingon apan dili bahandianon ngadto sa Diyos.”​—Lucas 12:16-21.

“Bahandianon ngadto sa Diyos.” Unsay gipasabot niana ni Jesus? Ang usa ka tawong dato niining paagiha adunay “bahandi sa langit”​—usa ka maayong ngalan uban sa Diyos. Ang maong bahandi dili gayod mahanaw. (Mateo 6:20; Hebreohanon 6:10) Inay mahisama sa usa ka bulak nga malawos, ang maong tawo gitandi diha sa Bibliya ngadto sa usa ka kahoy, kansang mga dahon dili malawos. Ug, kita gipasaligan, “ang tanang iyang pagabuhaton molampos.”​—Salmo 1:1-3, 6.