Nakasugod Ka na ba Sukad ug Sunog sa Lasang?
SIYEMPRE WALA, ikaw moingon. Apan hulat una! Tingali ikaw nakasugod na. Pamatia ang mga pulong sa disipulong si Santiago: “Ang dila usa ka gamay nga sangkap ug bisan pa niana nagahimog dagkong pagpanghambog. Tan-awa! Pagkagamay sa kalayo nga gikinahanglan sa pagsunog sa dako kaayong lasang!”—Santiago 3:5.
Ang dila maoy hinungdanong organo sa pagsulti, apan pagkasayop nga pagkagamit kini! Ang mga tawo naggamit sa dila sa pagpamakak ug sa pagpasipala. Pinaagi niana sila madinaotong magsaway sa uban, magdaot sa ilang dungog, ug manikas kanila. Ang mga tigpatunghag kagubot naggamit sa dila aron sa pag-awhag ug rebolusyon. Si Adolf Hitler migamit sa iyang dila aron sa pagpalihok sa nasod sa pagpakiggubat—usa gayod ka ‘sunog sa lasang’!
Bisan kadtong may maayong mga tumong makapahinabog gagmayng ‘mga sunog sa lasang.’ Nakasulti ka na bag usa ka butang ug dayon nanghinaot nga imo kadtong mabakwi? Kon mao, nasabtan nimo kon unsay gipasabot ni Santiago sa dihang miingon siya: “Ang dila, walay tawo nga nakapaaghop niini.”—Santiago 3:8.
Bisan pa niana, mahimong sulayan nato paggamit ang atong dila sa maayong paagi. Sama sa salmista, kita determinadong makaingon: “Pagabantayan ko ang akong mga dalan aron dili makasala pinaagi sa akong dila.” (Salmo 39:1) Imbes madinaotong manaway sa uban, makapalig-on kita kanila. Inay magpasipala sa mga tawo, makasulti kitag maayong mga butang bahin kanila. Inay manglimbong ug manglansis, makasulti kita sa kamatuoran ug manudlo. Sa dihang gipalihok sa maayong kasingkasing, ang dila makasultig kahibulongang mga pulong sa pagtambal. Si Jesus migamit sa iyang dila sa kahibulongang paagi sa pagtudlo sa katawhan mahitungod sa kaluwasan.
Sa pagkatinuod, “ang kamatayon ug kinabuhi anaa sa gahom sa dila.” (Proverbio 18:21) Ang imo bang dila makamatay o makahatag kinabuhi? Kana ba nagsugod ug ‘mga sunog sa lasang’ o nagpalong niana? Ang salmista nag-ampo sa Diyos: “Hinaot ang akong dila magaawit sa imong pulong, kay ang tanan nimong mga sugo matarong man.” (Salmo 119:172) Kon atong ugmaron ang tinamdan sa salmista, kita usab mogamit sa atong dila sa maayong paagi.
[Picture Credit Line sa panid 32]
Letrato sa U.S. Forest Service