Sila ba Makahatag ug Kaayohan Kanimo?
ANG magasing imong gikuptan gidesinyo nga mahimong tinubdan sa pagdasig, nga magpahinumdom sa mga lagda sa Bibliya sa pagpalig-on sa mga pamilya ug paghupot sa personal nga integridad. Kini nagpakita nga ang samok nga mga panahon karong adlawa gitagna na sa Bibliya, ug nagpasiugda kini sa solusyon—ang Ginghariang kagamhanan sa Diyos. Makabaton ba kamog kaayohan gikan sa Ang Bantayanang Torre ug gikan sa Pagmata!, ang kauban niining magasin?
Gikan sa Pilipinas ang usa ka babayeng ginganlag Vilma misulat: “Kon adunay pulong nga magbatbat sa inyong mga basahon, sa akong hunahuna akong pilion ang ‘kahibulongan.’ Nakita ko ug nabasa sa unang higayon ang inyong Pagmata! ug Ang Bantayanang Torre sa dihang ako nagsakay ug bus nga mipauli gikan sa Manila. Kasagaran ako magdalag peryodiko sa dihang ako magbiyahe, apan niining panahona ako wala magdala.
“Naglingkod sa akong tapad mao ang usa ka edarang lalaki nga nagbaton sa inyong mga basahon. Human sa iyang pagbasa sa Pagmata!, iyang gipagawas ang laing magasin, Ang Bantayanang Torre. Gipahimuslan ko ang higayon sa paghulam sa Pagmata! Sa tinuoray pa, nahimuot gayod ako sa pagbasa niadtong mga magasina kay ang mga artikulo bug-os nga makaiikag, tukma-sa-panahon, ug makapalipay.”
Ang babaye mitapos: “Gusto ko nga makadawat sa inyong mga magasin. Palihog pahibaloa ako kon sa unsang paagi makadawat ako niana.” Ang sangang-buhatan sa mga Saksi ni Jehova sa Pilipinas nalipay sa pag-alagad pinaagi sa pagdugang niining babayhana sa ilang talaan sa ginapadalhan.