Labi Pang Bililhon kay sa mga Korales
Ang nagdaghang bisita nalipay tungod sa mga talan-awon nga sama niini sa katubigan sa Pulang Dagat.
Ang dili maihap nga mga isda nga nagkalainlaing kolor ug bulok makaiikag alang niadtong nagalangoy diha sa tin-awng katubigan. Apan matikdi nga sa palibot sa mabulokong mga isda nga makita dinhi, adunay usa ka makadani sa mata nga talan-awon sa ubang ilalom-sa-dagat nga mga kahibulongan, lakip ang hayag ug kolor nga mga korales.
Ang matahom nga mga korales makita diha sa daghang porma ug kolor. Ingon sa imong mahanduraw, bisan sa karaang panahon ang dagkong mga piraso sa korales mahal kaayo. Gikan niini ang mga artisano magdesinyog maanindot nga mga dayandayan, ug ang mga magsusulat sa Bibliya naghisgot ug mga korales nga may bulawan, salapi, ug mga rubi. (Proverbio 3:14, 15; Ezekiel 27:16) Apan kadto nga mga magsusulat nagtabang kanato nga makita ang labaw pa sa katahom ug bili sa mga korales mismo.
Kini nagpasiugda nga ang pipila ka butang mas bililhon pa ug nga labi pa natong pakahamilion sila. Ang buotan, may katakos nga asawa maoy usa niini, kay atong mabasa: “Ang usa ka may katakos nga asawa kinsay makakaplag? Ang iyang bili labaw pa kay sa mga korales.” (Proverbio 31:10) Ikaw ba usa ka minyo nga lalaki? Tan-awa pag-usab ang matahom nga mga korales dinhi, ug palandonga kon gipabilhan ba nimo ang imong asawa nga takos alang kaniya.
Kon kita lalaki man o babaye, minyo o dili-minyo, ang talan-awon sa matahom nga mga korales motabang unta kanato sa pag-apresyar sa labaw pag bili nga diyosnong kaalam, pagsabot, ug kahibalo. Ang Pulong sa Diyos nag-ingon: “Malipayon ang tawo nga nakakaplag ug kaalam, ug ang tawo nga nakabaton ug pagsabot, kay ang pagpakabaton niana labi pang maayo kay sa pagpakabaton ug salapi ug ang kaayohan niini labaw pa kay sa bulawan mismo. Kini labi pang bililhon kay sa mga korales, ug ang tanang ubang imong gikalipayan dili ikatandi niana.”—Proverbio 3:13-15; 8:11.
Busa kon nakakita man kanila pinaagi sa atong paglangoy o pinaagi sa letrato, ang mga korales sa Pulang Dagat angayng magpadayag kanato sa katahom ug bahandi alang sa mapuslanong pagpalandong.