Maayong Balita Gikan sa Malawi!
NIADTONG Nobyembre 15, 1993, ang Watch Tower Bible and Tract Society of Pennsylvania opisyal nga narehistro sa nasod sa Malawi sa habagatan-sidlakang Aprika. Kini mohatag sa mga Saksi ni Jehova ug legal nga pag-ila ug kagawasan sa pagwali sa mga kamatuoran sa Bibliya ngadto sa mga tawo sa Malawi.
Balik niadtong 1948, ang sangang buhatan sa Watch Tower Society natukod sa Malawi aron dumalahon ang buluhaton sa mga Saksi ni Jehova nianang yutaa. Niadtong Enero 8, 1957, ang Watch Tower Society narehistro didto sa unang higayon. Sa daghang tuig ang mga Saksi ni Jehova nakatagamtam ug kusog nga pag-uswag. Apan mibuto ang mapintas nga paglutos niadtong 1964. Ngano?
Sa pagsunod sa Diyos, ang mga Saksi ni Jehova istriktong nagpabiling neyutral sa politika. (Juan 17:16) Dayag, ang pipila wala gayod makasabot niining Kasulatanhong baroganan ug sayop nga nagsumbong sa mga Saksi ingong radikal nga relihiyon ug ingong mga malapason sa balaod. Busa, ang pila mibating may rason sa paglutos niining mahigugmaog-kalinaw nga mga Kristohanon. Daghang Saksi ang gipapahawa sa ilang mga trabaho, gikulata, ug ingon man usab gipakaulawan. Ang pipila gipugos sa pagbulag sa ilang mga anak.
Niadtong 1972 kapin sa 30,000 ka Saksi ug pila ka nagtuon sa Bibliya uban kanila napugos sa pagbiya sa nasod sa kahadlok nga mapildihan sa ilang kinabuhi. Linibo ang mipuyo sa mga kampo sa kagiw sa kasikbit nga Mozambique. Apan niadtong 1975 kining maong mga kagiw gipadalag balik sa Malawi, diin ilang atubangon ang dugang paglutos. Daghan ang gibalhog sa mga kampo konsentrasyon. Tali niining kaguliyang, ang Watch Tower Society gipala sa opisyal nga talaan sa legal nga mga organisasyon sa Malawi. Sukad niadto ang mga Saksi ni Jehova ug ilang legal nga mga organisasyon gidili sa maong yuta.
Bisan pa niining tanang mga hitabo, ang mga Saksi wala manimalos. Wala gayod sila mopormag magubtanong mga panon o mialsa sa pagprotesta batok sa kagamhanan. Hinunoa, sila mainampoong nag-amping sa ilang Kristohanong obligasyon sa pagpakitag angay nga pasidungog ug pagtahod sa nagamandong “labaw nga mga awtoridad.” (Roma 13:1-7; 1 Timoteo 2:1, 2) Ang mga Saksi nagpabilin usab sa hataas nga sukdanan sa Kristohanong pagkinabuhi nga gihatag sa Bibliya ug busa nagpakitag usa ka maayong panig-ingnan sa pamatasan.
Uban sa ilang bag-ong nabatonan nga kagawasan, ang mga Saksi ni Jehova sa Malawi sa pagkakaron determinado sa pagpadayon sa dinaliang pagwali sa mga kamatuoran sa Bibliya, “sa paborableng panahon.”—2 Timoteo 4:2.
[Hulagway sa panid 31]
Si M.G. Henschel uban sa pamilyang Bethel sa Malawi sa katuigang 1960