Nganong Mainteres sa Relihiyon?

SA MATAG nasod sa yuta, adunay interes sa relihiyon. Sa laing bahin, aduna say daghan nga sa kaprangka magaingon nga sila walay interes sa relihiyon. Apan kana ba ang kanunay nilang gibati?

Ang kinaiyahan sa tawo maoy ingon nga ang tawo dili gayod matagbaw sa materyal lamang nga mga butang. Gikinahanglan sa mga tawo ang espirituwalidad. Ang adlaw-adlaw nga pagkinabuhi nga nasentro sa pagbaton sa pisikal nga mga kinahanglanon lamang, uban ang panagsang mga yugto sa kalingawan, dili magtagbaw sa bug-os sa kinailadmang mga panginahanglan sa usa ka tawo. Lahi sa mga hayop, ang mga tawo buot masayod, ‘Unsa ang katuyoan sa kinabuhi?’ ‘Kining hamubong kinabuhi, nga naglakip sa daghan nga matahom ug sa daghan usab nga maot, mao ba lamang ang anaa?’ Dili ba nakasukna kag mga pangutanang sama niini?

Bisan pa, daghan nga milyonmilyong tawo nga buhi karong adlawa nagtubo sa mga palibot nga nakapabugnaw sa makahuloganong interes sa relihiyon. Kanang impluwensiyaha tingali naggikan sa ilang mga ginikanan, gikan sa mga magtutudlo, gikan sa mga isigkaingon, o bisan gikan sa gobyerno.

Si Skalabrino, usa ka batan-ong lalaki nga taga-Albania, misaysay nga ubos sa pagmandong Komunista ang katawhan gitudloan nga walay Diyos. Dugang pa, peligroso nga sila maghisgot ug relihiyon; ang paghisgot mahimong mosangpot sa pagkabilanggo. Ugaling, sa 1991, sa dihang didto sa Switzerland ingong usa ka kagiw, nahatagan siyag kahigayonan sa pagtuon sa Bibliya. Siya midawat. Ngano?

Aw, sa Albania siya nakadungog nga adunay usa ka basahon nga Bibliya, apan wala gayod siyay nasayran bahin niini. Busa, sa sinugdan mahimong dili ang tinguha nga masabtan ang Bibliya ang pangunang nagtukmod kaniya. Bisan pag giingnan siya nga siya magtuon bahin sa katuyoan sa Diyos alang sa tawo ug sa yuta, gisabot usab niya nga kadto kahigayonan nga mapauswag ang iyang paggamit sa lokal nga pinulongan. Apan, dali niyang nasayran nga ang iyang nakat-onan nagtagbaw sa nakadulot nga espirituwal nga pangandoy sa kahiladman sa iyang bahin. Siya mibatig kalipay ug kahimuot sa dihang iyang nasayran ang saad sa Diyos nga usa ka bag-ong kalibotan diin ang kalinaw maglungtad, usa ka kalibotan diin ang mga tawo mabuhing walay kataposan ug makapahimulos sa kadagaya sa tanang butang nga kinahanglanon sa kinabuhi. Misamot ang iyang interes sa dihang iyang nakat-onan nga siya ug ang iyang pamilya mahimong bahin sa maong bag-ong kalibotan. Kay wala makaarang sa pagtipig sa maayong balita sa iyang kaugalingon, giteleponohan niya ang iyang pamilya didto sa Albania aron ipaambit kana kanila.

Si Aleksei, kinsa nagpuyo sa Rusya, natingala usab sa epekto nga ikahatag sa tukmang kahibalo sa Bibliya diha sa kinabuhi sa usa ka tawo. Kay nabug-atan sa mga suliran ug wala makakaplag ug makapatagbawng katin-awan sa katuyoan sa kinabuhi, siya nagplanong maghikog. Ugaling, miadto una siya sa Pinlandia aron moduaw sa usa ka amigo. Sa pagpaingon didto nga nagsakay sa tren, iyang gisulti ang iyang mga suliran ngadto sa pila ka kaubang pasahero. Apil kanila mao ang usa sa mga Saksi ni Jehova, kinsa miawhag kaniya sa pagtuon sa Bibliya kay kana mohatag ug mga solusyon sa maong mga suliran. Si Aleksei maduhaduhaon. Sa biyahe pauli, siya may susamang kasinatian. Niadtong panahona laing Saksi ang misulti ug gisultihan siya nga siya sa nangagi nakabaton sa samang matang sa mga suliran apan ang Bibliya nakatabang kaniya sa pagbuntog niana nila. Siya midasig usab kaniya sa pagtuon sa Bibliya. Sa iyang pag-abot sa balay, ang telepono mikiring. Kadto laing amiga, kinsa nagtuon uban sa mga Saksi ug malipayon kaayo. Siya nagsugod pagkaamgo nga tingali ang Bibliya makatagana gayod kon unsay iyang gikinahanglan, apan nahibalo siya nga kon walay tabang dili siya makasabot niana. Miuyon siya nga magbaton ug regular nga pagtuon sa Bibliya sa balay uban sa mga Saksi ni Jehova, ug siya misugod sa pagtambong sa ilang mga tigom. Wala dangtig dugay nga iyang nasabtan kon nganong kadtong nag-umol sa ilang mga kinabuhi sumala sa gitudlo sa Bibliya maoy malipayon kaayo, bisan pag sila nag-atubang usab ug mga suliran nga kasagaran sa katawhan.

Kay nakasabot sa kinaiyahan sa tawo, si Jesu-Kristo miingon: “Ang tawo dili mabuhi sa tinapay lamang.” (Mateo 4:4, The New English Bible) Siya miingon usab: “Malipayon kadtong mahunahunaon sa ilang espirituwal nga panginahanglan.” (Mateo 5:3) Ang ilang kalipay moabot tungod kay sila dulot nakaamgo sa ilang panginahanglan, nagkuha sa tukmang mga lakang sa pagtagbaw niana, ug makatagamtam sa panalangin sa Diyos. Hinuon, ang atong espirituwal nga panginahanglan dili matagbaw pinaagi lamang sa pag-anib sa usa ka iglesya o pagtambong sa pila ka relihiyosong serbisyo. Ang relihiyon nga kasagarang rituwalistiko tingali makapahimuot sa mga pagbati sa usa, apan nagtagana ba kanag matinud-anong mga solusyon sa mga suliran sa kinabuhi? Bisan pag ang usa ka relihiyon nagpasiugda sa pila ka paninugdang mga ideya nga maayo, kon mapakyas kini sa pagtaganag tinuod nga pagsabot sa tinuod nga katuyoan sa kinabuhi, motagbaw ba kana sa imong espirituwal nga panginahanglan? Labaw pang kabalak-an, ang pagtuman ba sa maong relihiyon mosangpot sa usa ka maayong relasyon uban sa Diyos? Kon wala kana, wala unyay tinuod nga katagbawan.

Maylabot niini daghang tawo ang nagapangita sa butang nga wala pa nila hikaplagi.

[Hulagway sa panid 3]

Ang imong espirituwal nga mga panginahanglan tinuod bang matagbaw pinaagi sa pag-anib sa usa ka iglesya?

[Hulagway sa panid 4]

Nakaplagan sa daghan nga sa dihang makasabot sila sa Bibliya, makabatog bag-ong kahulogan ang kinabuhi