Nganong Nagauswag ang mga Daotan?

“NGANO man nga ang mga daotan mismo nagapadayon sa pagkinabuhi?” Kining pangutanaha gisukna dugay na kanhi sa matinumanong si Job, ug kini makadaghang gisubli sukad sa iyang adlaw. Lagmit anaa kini sa mga hunahuna sa daghang tawo sa teritoryo sa kanhing Yugoslavia (sama sa babaye nga gipakita sa atong hapin) kinsa nagbangotan niadtong nagaantos sa usa ka makalilisang nga gubat. Ngano man nga ang daotang mga tawo nagalungtad ug nagauswag pa gani? Sumala sa gisulti ni Job, kasagaran ang “ilang mga balay mao ang kalinaw mismo, halayo sa kalisangan, ug ang bunal sa Diyos wala ipahamtang kanila.”​—Job 21:7, 9.

Nagpasabot ba kini nga walay bili ang pag-alagad sa Diyos, paghigugma sa silingan sa usa, ug paglikay sa pagbuhat ug daotan? Dili gayod! Ang Bibliya nagahatag kanato ug hustong panglantaw sa dihang kini nag-ingon: “Ayaw paningkamot nga malabwan ang mga mamumuhat ug daotan o sundogon kadtong nagbuhat ug daotan. Kay sama sa sagbot sila sa dili madugay malawos, ug malaya sama sa lunhaw sa ting-init. Salig sa GINOO ug buhata ang maayo.”​—Salmo 37:1-3, The New English Bible.

Oo, ang daw pag-uswag sa mga daotan temporaryo lamang. Sa pagkatinuod, ang ilang mga kinabuhi mubo kaayo, samtang kadtong nagaalagad sa Diyos adunay mahimayaong paglaom sa umaabot. Sa dili madugay, ang saad sa Diyos matuman: “Iyang [Diyos] pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.” (Pinadayag 21:4) Ang mga matarong lamang, dili ang mga daotan, ang makakita nianang panahona. Pagkamakapadasig gayod nga moduol sa Diyos ug mokat-on sa pagbuhat sa iyang kabubut-on, bisan unsa pa ka daotan kadtong anaa sa palibot kanato!

Kon buot nimo ang dugang impormasyon o buot nimong may moduaw aron sa pagdumalag libreng pagtuon sa Bibliya sa balay uban nimo, palihog pagsulat sa Watch Tower, P.O. Box 2044, 1099 Manila, o sa nahiangay nga direksiyon nga gilista sa panid 2.