“Ang Kalinaw sa Diyos nga Nagalabaw sa Tanang Panghunahuna”
SA TIBUOK kasaysayan, ang matinumanong mga alagad sa Diyos nakasinatig mga panahon sa grabeng kasakit sa emosyon. Kini tinuod kaayo karong adlawa, sanglit kita nagkinabuhi sa “makuyaw nga mga panahong lisod sagubangon”! (2 Timoteo 3:1) Si apostol Pablo nagtambag sa mga Kristohanon sa pagtugyan sa ilang mga kabalaka kang Jehova pinaagi sa pag-ampo. Uban sa unsang sangpotanan? “Ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”—Filipos 4:7.
Unsa kining “kalinaw sa Diyos”? Kini maoy kalinaw nga nagagikan sa pagbaton ug usa ka suod nga relasyon uban sa Maglalalang. Ang maong pagkasuod mohatag kanatog pagsalig nga, bisan pa sa atong mga suliran, si Jehova “dili mobiya sa iyang katawhan; dili gayod niya pasagdan kadtong mga iya.”—Salmo 94:14, Today’s English Version.
Kini wala magpasabot nga kita dili maapektohan sa kalisod. “Daghang kalisdanan ang matarong,” nag-ingon ang salmista. (Salmo 34:19) Apan ang kalinaw sa Diyos makahatag kahupayan kanato. Sa unsang paagi?
Ang kalinaw sa Diyos “nagalabaw sa tanang panghunahuna,” misulat si Pablo—o sama sa paghubad niini sa Concordant Version, kini “labaw sa matag kahimtang sa hunahuna.” Ang kabalaka makapasinati kanatog nagkalainlaing makapabalakang mga emosyon. (Ecclesiastes 7:7) Bisan pa, ang kalinaw sa Diyos makapalig-on kanato, ilabina kon nagkinahanglan kita ug “gahom nga labaw sa kasarangan.”—2 Corinto 4:7; 2 Timoteo 1:7.
Dugang pa, ang kalinaw sa Diyos maoy usa ka proteksiyon. Kini “magabantay sa inyong mga kasingkasing ug sa inyong mga gahom sa pangisip,” ingon sa gisulat ni Pablo ngadto sa mga taga-Filipos. Ang Gregong pulong gihubad “magabantay” maoy usa ka militaryong termino nga malagmit makapukaw ug hulagway sa hunahuna labot sa mga bantayanan nga giguwardiyahan kanunay sa adlaw ug gabii. Sa samang paagi, ang kalinaw sa Diyos molihok ingong 24-oras nga guwardiya sa atong mga kasingkasing ug sa atong mga gahom sa hunahuna.—1 Corinto 10:13; itandi ang Efeso 4:26.
Sa pagpalandong sa makapabug-at nga mga hagit nga atong ginaatubang karong adlawa, dili ba ang kalinaw sa Diyos maoy butang nga kita magmapasalamaton?—Salmo 18:2; itandi ang Exodo 40:38.