Unsa ka Bililhon ang Kinabuhi Alang Kanimo?

USA ka bayong milukso ngadto sa iyang kamatayon gikan sa ikawalong andana sa usa ka apartment. Iyang nabasa ang usa ka libro nga naghubit sa paghikog pinaagig paglukso ingong “walay sakit o walay kagil-as o kahadlok; hinunoa, maayo ang bation.” Ang awtor niining libroha, nga gipatik sa Hapon, miingon nga nagtanyag lamang siya sa “paghikog ingong usa sa mga kapilian sa kinabuhi.”

Ang mga tawong naghikog dili lamang ang mga tawong nagapadayag ug kawalay-pagpabili sa kinabuhi karong adlawa. Ang paspaserong mga drayber nagpakita usab ug diyutay kaayong pagtahod sa kinabuhi. Ang uban nagamaneho gani bisag ilalom sa impluwensiya sa makahubog nga ilimnon, nga daghan ang kusog kaayong mopadagan nga nameligrong maaksidente.

Gipakita sa uban ang diyutay kaayong pagpabili sa ilang kinabuhi pinaagi sa ilang hinobrang pagtamod sa kalingawan. Ang mga hinabako modumili sa pag-undang sa pagtabako, bisag ang pagpanabako makamatay ug gitawag nga inanay nga paghikog. Imbes huptan ang kaputli niining nabuang-sa-sekso nga kalibotan, daghan ang nagapangagpas sa malaw-ay nga dalan nga sagad motultol ngadto sa kamatayon.

Nga wala gani makamatikod bahin niini, ang uban nagahikaw sa ilang kaugalingon sa daghang tuig sa kinabuhi pinaagig sobrang pagkaon, sobrang pag-inom, kulang nga ehersisyo, ug pagpangagpas sa kalingawan. Ang awtor nga Hapones nga si Shinya Nishimaru nagpasidaan: “Ang mapatuyangong mga batasan sa pagkaon makadaot sa mga obra sa lawas, ug ang pagpangagpas lamang sa kaharuhay ug kalingawan makaut-ot sa kabaskog sa mga tawo.” Ang uban adunay panghunahuna nga sama niadtong mga tawo sa karaang mga panahon nga miingon: “Mangaon kita ug manginom, kay ugma kita mangamatay.”​—Isaias 22:13; 1 Corinto 15:32.

Oo, ang kawalay-pagpabili sa kinabuhi kaylap karong adlawa. Busa, tukma nga isukna, Unsa ka bililhon ang kinabuhi alang kanimo? Angay bang pagaampingan ang kinabuhi sa bisan unsang bili? Ug aduna bay mas bililhon pa kay sa atong kinabuhi karon?