“Wala pa Gayod Akoy Nakita nga Sama Niini!”

NIADTONG 1993 ang sangang buhatan sa Watch Tower Society sa Argentina gidapit nga magpadala ug usa ka libong delegado ngadto sa Santiago, Chile, alang sa upat-ka-adlaw nga “Diyosnong Pagtulon-an” Distritong Kombensiyon sa mga Saksi ni Jehova. Kini mao ang unang higayon nga ang mga Saksi sa Argentina gidapit sa pagbiyahe ingong dako nga pundok ngadto sa usa ka langyawng kombensiyon.a Unsa ang sanong? Kapin sa 8,500 ka aplikasyon ang nadawat, nga gipili gikan niana ang 1,039 ka delegado.

Ang gidaghanon nga 14 ka bus ang giabangan aron mohimo niining 1,400-ka-kilometros nga biyahe gikan sa Buenos Aires ngadto sa Santiago. Ang 26-oras nga panaw gihimong mas makalingaw sa maanindot nga talan-awon. Mitadlas sa Kabukirang Andes, ang mga delegado miagi duol sa Aconcagua, diha sa 6,960 metros ang kinatas-ang bukid sa Kasadpang Hemispera. Ilabinang halandomon ang titip, likoliko nga dulhogon paingon sa Chile. Ang mga drayber gipalakpakan pag-ayo tungod sa ilang kahanas sa pagdrayb sa mga bus diha sa malisod nga dalan!

Ang labing matahom nga talan-awon, hinunoa, nakaplagan sa kombensiyon mismo. Sa usa ka kalibotan nga may pagdumtanay sa mga nasod ug pag-awayay sa mga rasa, pagkamakaparepresko ang pagkakita sa usa ka nahiusa nga panon sa 80,000 gikan sa 24 ka nasod nga nanambong​—tinuod gayod nga usa ka internasyonal nga panag-igsoonay! Kay nakakita mismo sa panaghiusa taliwala sa mga kombensiyonista, ang pipila sa mga drayber sa bus mipahayag ug interes nga mokat-on ug dugang bahin sa mga Saksi ni Jehova. “Wala pa gayod akoy nakita nga sama niini!” usa kanila ang mipahayag.

[Footnote]