Usa ka Walay Kahulogang Rituwal?
ANG sakramento sa pagkompisal gihimo sa mga Katoliko sa daghan nang kasiglohan. Apan, alang sa kadaghanan kini maoy usa ka walay kahulogang rutina. Namalandong sa bata pa siya, usa ka prinsipal sa hayskul nga ginganlag Bob miingon: “Tin-edyer pa ako niadto, ug bisan niadtong panahona wala kaayo nako kini hatagig seryosong pagtagad.” Nganong wala? Alang kaniya, ang pagkompisal maoy usa ka walay kahulogang rituwal. Siya misaysay: “Ang pagkompisal maoy sama sa pagdala sa tanan nimong mga bagahe nga puno sa mga sala ngadto sa empliyado sa aduwana diha sa tugpahanan sa ayroplano. Pangutan-on ka niya bahin sa imong mga sala ug dayon tugotan ka niya sa pagsulod pinaagi sa pagbayad ug buhis alang sa mahal nga mga butang nga imong gipalit samtang didto ka sa langyawng nasod.”
Sa susama, si Frank Wessling, nga nagsulat diha sa U.S. Catholic, nagbatbat sa batasan sa pagkompisal ingong “usa ka pinayano kaayong lakang-por-lakang nga giya, gikan sa pagkuha sa ordinaryong sala pinaagi sa sinag-ulong pangadyi sa paghinulsol ngadto sa rituwal nga buhat agig simbolo sa paghinulsol.” Ang pahinapos ni Wessling? “Kombinsido ako nga ang Pagkompisal maayo alang sa kalag,” matod pa niya. “Apan ang paagi sa paghimo niini sa mga Katoliko mao ang problema.”
Gipadayag sa Bibliya ang pagsugid sa sala sa lahi kaayo nga paagi. Ang labing hinungdanon mao ang pagsugid sa sala ngadto sa Diyos. (Salmo 32:1-5) Ug ang Kristohanong disipulo nga si Santiago nagsulat: “Aduna bay masakiton taliwala kaninyo? Ipatawag kaniya ang mga ansiyano sa kongregasyon ngadto kaniya, ug paampoa sila alang kaniya, nga magahaplas kaniya ug lana sa ngalan ni Jehova. Busa sa dayag isugid ang inyong mga sala ngadto sa usag usa ug pag-ampo alang sa usag usa, aron kamo mangaayo.”—Santiago 5:14, 16.
Ang usa ka Kristohanon nga nabug-atan sa sala makatawag sa mga magtatan-aw sa kongregasyon, kinsa makahatag ug personal ug praktikal nga tambag gikan sa Bibliya aron matabangan ang nakasala sa pagbiya sa iyang makasasalang dalan. Ang mga magtatan-aw makahatag ug angay nga pagdasig samtang ilang panid-an ang pag-uswag sa usa nga masakiton sa espirituwal. Pagkalahi niini sa seremonyal nga rituwal sa pagkompisal nga ginahimo sa mga iglesya karon! Mapalig-on sa personal nga tabang sa mga ansiano sa kongregasyon, ang mahinulsolong mga nakasala makabatog kahupayan nga gibati ni David, sama sa gipahayag diha sa iyang salmo: “Ang akong sala sa kataposan gisugid ko kanimo, ug wala nako taboni ang akong kasaypanan. Miingon ako: ‘Isugid ko kang Jehova ang akong mga kalapasan.’ Ug ikaw mismo mopasaylo sa kasaypanan sa akong mga sala.”—Salmo 32:5.