Kahon sa Pagkaon Nagpamatuod

SA MGA adlaw human sa linog sa Kobe, Hapon, niadtong Enero, ang mga tawo sa naapektohan nga dapit nalisdan sa pagpangitag pagkaon. Bisan pa, ang mga Saksi ni Jehova wala makulangi ug pagkaon, tungod sa malulutong tabang sa ilang mga higala. Sulod sa unang duha o tulo ka adlaw human sa linog, ang haduol nga mga kongregasyon nagtaganag binolang kan-on. Sa wala madugay, ang mahangawaong mga higala nagtaganag mga kahon sa pagkaon. Diha sa mga kahon sa pagkaon, daghan ang nagpatapot ug mugbong mga sulat nga nagpahayag ug kabalaka alang sa mga naapektohan. Kadtong nakadawat sa mga pagkaon miingon nga ang matag pagpangaon “inasinan sa ilang mga luha” sanglit dili sila makapugong sa ilang mga luha sa dihang basahon nila ang mugbong mga sulat.

Ang mga Saksi ni Jehova nakig-ambit sa ilang pagkaon sa uban nga nanginahanglan. Usa ka Saksi ang nagkaon sa iyang paniudto samtang nagsakay sa sakyanan uban sa dili-Saksing kauban nga nagtrabaho sa samang kompaniya. Busa iyang gipaambit ang usa sa kinahon nga mga pagkaon nga iyang nadawat.

“Diin man nimo palita kining kinahon nga paniudto?” nangutana ang iyang kauban. Gisaysay sa igsoon ang pagtabang nga buluhaton sa mga Saksi. “Wala ako makakaon ug mga utanon sulod sa pipila ka adlaw. Akong isalin ang pipila ug dad-on kini sa balay alang sa akong pamilya,” mapasalamatong mipahayag ang tawo.

Sa ikatulong higayon nga nahitabo kini, ang kauban sa trabaho mihatag ug 3,000 yen (mga $35, T.B.) ngadto sa Saksi ug miingon: “Ako nasinati sa inyong mga kalihokan, busa palihog paamota ako sa inyong buluhaton. Akong giapresyar ang imong pagpakig-ambit sa imong paniudto uban kanako. Sa pagkatinuod, ang imong mga higala ngatanan maoy buotang mga tawo.”