Mga Saksi ni Jehova sa Tibuok Kalibotan—New Zealand
MAKADAYEG ba ang mga pulo kang Jehova? Oo, sumala sa Isaias 42:10: “Pag-awit kang Jehova ug usa ka bag-ong alawiton, ang iyang pagdayeg gikan sa kinatumyan sa yuta, . . . kamong mga pulo ug kamong mga molupyo niini.” Ang mga pulo nga naglangkob sa New Zealand dayag nga nagadayeg kang Jehova. Gibantog sa kalibotan tungod sa mga lanaw, mga luuk, habog nga kabukiran, mga bukid nga yelo, kabaybayonan, punog-pako nga bagang kalasangan, ug lunhaw nga mga talan-awon sa yuta nga sibsibanan, ang New Zealand tinuod nga nagpadayag sa pagkaharianon ug pagkahalangdon sa Maglalalang sa langit ug yuta.
Sukad lamang sa pagsugod sa siglo, dugang ug dugang nga mga molupyo sa New Zealand ang nagdugang sa ilang mga tingog sa pagdayeg kang Jehova pinaagi sa pagdangop ngadto kaniya diha sa putli nga pagsimba ug sa pagpaambit sa uban sa maayong balita bahin sa Gingharian sa Diyos. Niining bag-o pa, usa ka Saksi nga nakadungog sa maayong kasinatian bahin sa pagpamatuod sa mga paryente mihukom sa pagsangyaw sa iyang pamilya. Siya nagtanyag ug gasang mga kopya sa librong Ikaw Mabuhing Walay Kataposan sa Paraiso sa Yuta ngadto sa ubay-ubayng mga membro sa pamilya. Ang resulta? Gitaho niya nga usa ka igsoong babaye ug usa ka igsoong lalaki nagtuon na karon sa Bibliya, usa ka pag-umangkong lalaki bawtismado na ingong usa sa mga Saksi ni Jehova, ug ang uban karon mas madinawaton na sa kamatuoran sa Pulong sa Diyos. Dako pa gihapon ang iyang natad nga pagasangyawan; gawas sa iyang mga ginikanan, siya may unom ka igsoong lalaki ug siyam ka igsoong babaye!
Ang pagdayeg kang Jehova moresulta usab kon usahon sa mga Saksi ang ilang mga paningkamot sa pagtukod ug mga Kingdom Hall. Pananglitan, ang kolumnista sa mantalaan nga si Roy Perkins misulat diha sa Opotiki News sa Mayo 17, 1994: “Kay dili usa ka magtutuo, ako nakadayeg kaayo sa mga trabaho ug mga paningkamot sa tanang dedikadong mga trabahante nga migugol ug dakong panahon ug paningkamot diha sa proyekto tungod sa gugma sa ilang Diyos.
“Niining tanang oras nga gigugol sa pagtrabaho sa hinapos nga semana ako walay nakita o nadungog bisag usa nga naglalis sa trabaho . . . Ang mga babaye diha sa ibabaw sa damba nagtrabaho duyog sa ilang mga lalaki, namalitada, nang-alsa, nanghakot ug mga materyales, ang tanan relaks ug malipayon.
“Ug walay nausik nga oras sa pagtrabaho tungod sa pagtabako ni Pulano. Alang sa tanan niadtong nagtrabaho diha sa bisan unsang kapasidad ang hangin libre sa polusyon gawas lamang sa pila ka baho sa pintal ug abog sa tisa.”
Ang lawas sa mga ansiano sa Opotiki Congregation misulat: “Ang tibuok nga proyekto nakahatag ug maayong impresyon sa mga tawo sa lungsod. Daw ang tanan naghisgotay bahin niini. Daghang pagtuon sa Bibliya ang nasugdan. Ang usa nga ilabinang nakita namo nga makapaikag kaayo mao ang magtiayon nga relihiyoso kaayo nga sa daghang tuig mihangyo nga dili namo duawon sila. Tig-anhaan sila sa gitukoran kada adlaw ug dayon sa tigom. Ang bana miingon pagkatapos, ‘Akong nakita nga kamo mao ang katawhan sa Diyos. Sa sulod, ako nangandoy sa tibuok nakong kinabuhi nga makig-uban sa mga tawong sama niini.’”
Sa miaging tuig, usa ka kolumnista sa Otago Daily Times miingon sa mosunod bahin sa paspas nga pagkatukod nga Kingdom Hall sa Dunedin: “Kadto maoy usa ka talagsaong kahimoan, usa ka talagsaong panig-ingnan sa panukmod ug tabang-sa-kaugalingon.” Ang mao gihapong mantalaan mikomento: “Ang mga tawo sa siyudad nagtan-aw nga may pagdayeg samtang ang usa ka dakong tinukod mibarog atubangan sa ilang mga mata, ug daghan tingali ang nagpalandong kon unsay laing mga kausaban ug positibong mga proyekto ang mahimong malampos kon mabatonan pa ang susamang dakong panon sa mga boluntaryo ug daghang matinabangong espiritu. Ang Kingdom Hall maoy usa ka ikapasigarbong simbolo sa mapuslanong paningkamot sa pagkab-ot sa mga resulta.”
Mahitungod sa daghang ginatos-gatos nga miduaw sa gitukoran, usa ka lalaki ang nakamatikod nga ang mga Saksi nagtukod ug “mga simbahan” samtang ang iyang relihiyon nagbaligya niini tungod sa nagkagamay nga mga membro. “Kon naghulat pa kamog laing napulog duha ka bulan, mapalit unta ninyo ang usa sa among mga simbahan,” siya miingon. “Ibaligya namo ang usa tungod kay dili kami makapadayon sa pagbayad. Apan, hinuon, kamo walay gibayrang klero. . . . Ug unya menos pag gasto ang pagmentinar sa inyong mga tinukod, dili habog nga mga tinukod nga may mga panting nga imposibleng mamentinar.”
Tin-aw, ang mga pulo makadayeg gayod sa Diyos. Hinaot ang mga pagdayeg kang Jehova magpadayon sa paglanog niining matahom nga yuta sa Pasipiko—ug sa tibuok kalibotan!
[Kahon sa panid 9]
LARAWAN SA NASOD:
1994 Tuig sa Pag-alagad
KINATAS-ANG GIDAGHANONG NAGSANGYAW: 12,867
PROPORSIYON: 1 ka Saksi sa 271
TUMATAMBONG SA MEMORYAL: 24,436
ABERIDS NGA PAYUNIR NGA MGA MAGMAMANTALA: 1,386
ABERIDS NGA MGA PAGTUON SA BIBLIYA: 7,519
GIDAGHANON SA NABAWTISMOHAN: 568
GIDAGHANON SA MGA KONGREGASYON: 158
SANGANG BUHATAN: MANUREWA
[Hulagway sa panid 9]
Mga payunir nga nagsangyaw sa kanataran sa mga 1930
[Hulagway sa panid 9]
Mga pasilidad sa sangang buhatan sa Manurewa
[Hulagway sa panid 9]
Pagsangyaw sa mensahe sa Gingharian sa Devonport, Auckland