Usa ka Legal nga Kadaogan
NIADTONG Abril 1995, usa ka talagsaong kadaogan sa korte ang naangkon. Kining tanan nagsugod niadtong Enero 28, 1992, sa dihang si Luz Nereida Acevedo Quiles, 24, giadmit sa El Buen Pastor Hospital sa Puerto Rico alang sa dili-dinalian nga operasyon. Sa pagsulod sa ospital, gisulti niya ug gisulat nga ingong usa sa mga Saksi ni Jehova, dili siya magpaabunog dugo. (Buhat 15:28, 29) Ang nalangkit nga mga kawani sa ospital, lakip ang doktor nga nagtambal kaniya, nahibalo pag-ayo sa iyang mga hangyo.
Duha ka adlaw human sa iyang operasyon, daghang dugo ang nawala ni Luz ug natugkan ug grabeng anemiya tungod sa pagdugo. Ang nag-atiman nga doktor, si Dr. José Rodríguez Rodríguez, nagtuo nga ang bugtong paagi sa pagtabang kaniya mao ang pag-abunog dugo. Busa, walay iyang pananghid o pagtugot, ang doktor nangayog mando sa korte sa pag-abunog dugo kang Luz.
Bisan pag may bug-os nga panimuot si Luz ug makahimo sa pagsulti sa iyang kaugalingon, si Dr. Rodríguez Rodríguez miinsister nga tungod sa pagkadinalian sa kaso, wala nay panahon nga mangayo pag pagtugot kang bisan kinsa. Ang abogado sa distrito, si Eduardo Pérez Soto, mipirma sa porma, ug ang huwes sa distrito, si Halangdong Ángel Luis Rodríguez Ramos, miisyu ug mando sa korte alang sa pag-abunog dugo.
Busa, niadtong Enero 31, 1992, gidala si Luz ngadto sa operahanan, diin didto siya giabunohan. Sa panahon sa pag-abuno, nadungog niya ang katawa sa pipila ka kawani sa ospital. Gikasab-an siya sa uban, nga nag-ingon nga ang gihimo diha kaniya maoy alang sa iyang kaugalingong kaayohan. Nakigbisog siya kutob sa iyang mahimo—ang tanan kawang. Sa pagkatapos sa adlaw, nadawat ni Luz ang upat ka yunit sa dugo.
Ang kaso ni Luz dili mao ang una ni ang kataposan nga nalangkit ang mga pag-abunog dugo ug ang mga Saksi ni Jehova sa Puerto Rico. Una pa sa iyang naagoman, labing menos 15 ka mando sa korte ang naisyu alang sa mga pag-abunog dugo nga kontra sa gusto sa hamtong nga mga Saksi ni Jehova, ug daghan pa ang giisyu sukad niadto. Ikasubo, diha sa usa ka kaso gipadapat ang mando sa korte, ug ang pag-abunog dugo gipugos diha sa usa ka pasyente nga walay panimuot.
Apan, ang pakig-away ni Luz wala matapos diha sa operahanan. Niadtong Oktubre 1993 usa ka kaso ang gisang-at batok sa Commonwealth sa Puerto Rico. Gihusay ang kaso sa Superyor nga Korte, ug niadtong Abril 18, 1995, usa ka desisyon ang gipakanaog sa iyang pabor. Gipahayag sa korte nga ang mando sa pag-abunog dugo maoy “dili subay sa batakang balaod ug naghikaw sa nag-akusar sa iyang katungod sa may-kagawasang pagsubay sa relihiyon, sa iyang pribasiya ug lawasnong determinasyon sa kaugalingon nga walay hustong proseso sa balaod.”
Hinungdanon kini nga desisyon sa korte, kay kini ang unang higayon nga ang korte sa Puerto Rico mihukom nga pabor sa mga Saksi ni Jehova diha sa usa ka kaso labot sa pag-abunog dugo. Ang desisyon nakakuhag dakong reaksiyon. Gihimo ang komperensiya sa prensa, nga presente ang mga tigmantala sa dagkong mantalaan, radyo, ug telebisyon.
Nianang samang gabii gisibya sa usa ka programa sa radyo ang interbiyo sa usa sa mga abogado ni Luz. Ang mamiminaw gidapit sa pagtawag sa telepono ug sa pagpatugbaw ug mga pangutana. Daghang doktor ug mga abogado mitawag ug mipahayag sa ilang paborableng reaksiyon alang sa kaso. Ang usa nga mitawag miingon: “Ang siyensiya wala makatino nga ang pag-abunog dugo makaluwas ug mga kinabuhi, ug sayop ang paghunahuna nianang paagiha.” Siya usab miingon: “Sa dili madugay, ang mga pag-abunog dugo igasulat sa kasaysayan ingong usa sa kinadak-ang mga kalapasan ug kasaypanan sa modernong medisina.”
Usa ka gitamod pag-ayong propesor sa balaod sa ulahi mitawag sa sangang buhatan sa Watch Tower Society ug mipahayag sa iyang dakong katagbawan nianang iyang giterminohang “usa ka malanog nga kadaogan.” Siya midugang nga ang desisyon sa korte naglaban sa balaodnong mga katungod, dili lamang sa mga Saksi ni Jehova, kondili sa tanang lungsoranon sa Puerto Rico.